مراية الوهم شعر/ سمير الأمير

[سمير الأمير]

"خدناها بالسيف الماضى وابوها ما كانشى راضى"
من دمه حمرنا الميه وعجنا اللقمه للقاضى
**
اتزملى بالعار واتكفى على حزنك
حزنك قبيح
ياللى الغريب متدفى فى حضنك
وابنك ما بين الدروشه والخوف.. مهاجر
الورد كافر والشجر والريح
والمجتمع والجوع
واللى اندبح مخدوع مش ميت شهيد...
**
انتى عروسة الفقر
زفوكى على مقدم صداق
من دم ابوكى القتيل
يا حسرة المتاعيس
وانتى قدام مراية الوهم
بتغنى لحصان ابليس
ياللى العريس خنق الغُنا ف صوتك
موتك فطيس..
وابنك مابين الدروشه والخوف شريد
**
كان أولى بيه يحرمك
من هز وسطك قبل ما تموتى
ومن غناكى الرخيص
كان أولى بيه يدفن أبوه
اللى اتحرم من اختيار موته
كان أولى بيه يقرا كتاب المجتمع والفقر
كان أولى بيه يصرخ فى وش العيد
" عيدُُ بأية حال عدت يا عيدْ"
واللى اندبح مخدوع مش ميت شهيد.

[عبد العلي فيلالي بالحاج]

الله الله يا بو سمرة

الله ولا غير الله حتى ما تنفعش قولةآه
لما حمرة الدم تنفع توابل
ولما الايد الوسخة تشيل الحب م السنابل
ترميه بعيد بعيد
هناك ورا البحر الهادي
وهناك ماحدش من حبايبو تمدلو الايادي
يا غربة القمح الصافي ف بلاد الموت
لا لو نفس ولا دمع ولا صوت
محدش يسمع انينو غير شاعر حزين
عينو بصيرة وايدو قصيرة مسكين
تعب من كثر النوح والصبر
ولا حدش داري بلي جواه
آه يازمن العجايب منك آه
:fl: :fl: :fl:

[ريمه الخاني]

واللى اندبح مخدوع مش ميت شهيد.

قاتلة حارقه....
ان نموت مخدوعين
تحية لقلمك

[سمير الأمير]

يا عبد العلى
هذا كتير على أخيك، ما كتبته أنت أكبر من أن أرد عليه.
محبتى لك تكبر كلما كبر الشعر بداخلى وكلما مررت أنت عليه
سميرالأمير

[سمير الأمير]

الأخت ريمه
تحية لك من القلب
أصبحت انتظر مرورك على قصائدى وعندما لا أجد اسمك كثيرا ما ألوم الكتابة ولا ألومك
لك محبة بعمق محيطات الابداع- ولك احترام بعمق محبتى لابداعك وشخصك الكريم
سميرالأمير