فزورة صحفية

[سمير الأمير]

فزورة صحفية
******

صاحبك وحرمه واختها
وارثين جريده يا قدها
بتوزع اتناشر عدد
طبعاً عرفتم اسمها؟

عنوانها من اسم الغلابه
لكن لأن الدنيا غابه
والكدب أصل ف طبعها
عامت على عوم العصابة

فى الأصل كانوا ( أربعة)
الله فى عون المطبعة
واحد فتح دكان هبل
جرنان بيعمل زوبعه


أما التلاته متبتين
قاعدين لها ومتنحين
ده ورثهم منذ الأبد
هوه الأبد كان ورث مين؟

استغفر الله.. كفرونى
صدقتهم.. فا استهبلونى
قاعدين على قلب اليسار
وقلبهم.. محفل ماسونى!!

[سيدة الشولي]

أخى / سمير
أحييك
أنت كاتب فوازير رائع
وطبعا شاعر ممتاز
بس أنا معرفتش مين (المنامين؟)
غُلُبْ غلابى؟
تحياتى
سيدة

[سمير الأمير]

الشاعره/ سيده الشولى
أشكرك على رأيك فى الشعر ولكنى أيضا لا أعرف مين (المنامين؟؟) أنا لم أكتب تلك الكلمه ، ربما تقصدين( الميامين) ولكن كل العاملين بالصحافة يعرفون من هم عصابة الأربعة- لك محبتى واحترامى
سمير

[سيدة الشولي]

أخى الفاضل
سمير

أنا اللى بأقول كلمة
(مين المنامين)..كلمة بمعنى مين المقصود؟
كنا بنقولها زمان واحنا صغار بنلعب إستغماية أو ما شابه


أما الميامين؟
أنا خلاص عرفتها..
يالله منهم لبتاع الفجل (زى ما بيقولوا )
ولا بتاع الفجل كمان مش عارفه؟

تحياتى
أختك سيدة

[سمير الأمير]

الأخت العزيزة / سيدة الشولى
أشكرك على التوضيح وفى المقابل ( ما هى الجريدة المصرية الحزبية التى تحمل اسماً بمعنى ( الناس؟)
وعموما أنا ممتن لك لأنك أضفتى لى كلمة من قاموس الطفولة لم اكن اعرفها وهى ( المنامين)
لك ولإبداعك الجميل كل التقدير
سمير

[معتصم الحارث الضوّي]

المبدع الصادق سمير الأمير
لله درّك . التوعية و توضيح الحقائق من أعظم غايات الشعر ، و بذلك تتكامل الفائدة و المتعة . شعر رصين في قالب ساخر لرسالة نبيلة .

فائق تقديري و مودتي