حـق الحلم (قصيدة بالعامية المصرية)

[محمد حامد محمد]

هارْسِمْ جـِناحى واطيـِرعلى كيفى

وارْسِم سَمَا كونى على راحـْــتى

هاحـْلـَم واخـَلـّى لحِلـْمى بـِكْفوفى

أرض وحـقيـقـة ثـابتـه مـِنْ تحتى


هاحْلـَم وحـَق الحِلم حـق صــَـــريح

لو كان لـُه أصْل وْحِصْن ضِد الريح

لو حلمى مش أوهام وكان لـُه جذور


يبقا حقيقه وحق ..مش تفاريح

هاطيــِر يـا دُنـْيا وْلـَو بنــُص جــــناح

ضيقـْـتى فْ عُيونى أو بـَقيتى بــَراح

هافـْضَل أعلـّى فْ حـِلـْمى واسْـتـَنـْاه


ما انا إبن حلمى.. وف حُضنـُه بس ارتاح

تـِقـْسى..تِحِـنـّى..تِـبـْنى لىَّ ســـدود

ما يهمـْنيش ده مادام لحلمى وجــود

وِن كـُنت احس ِ إن انتى ضيقتى عليه

هارْسِم لـُه كون واسع ما لوهش حدود