خاص بالساده مترجمى الشعر العامى [الأرشيف]

ايمن شعله

11/01/2008, 08:34 PM

اعزائى الكرام
انا شاعر مقيم فى هولنده وارغم التعاون مع مترجم لطرح ديوان بالتعاون مع مترجم
مرفق قصيده للترجمه اذا وجدتوها ذات اهميه للترجمه

ليله الدخله
الليله دخلتها
وكان لازم اكتب قصيده
عشان متحسش انى بعتها برخيص
ح تشوف عذابى ع الورق
وازاى انا
مبقتش شىء
غير انا
الخوف ساعات
بيكون غبى
وساعات نبى
الخوف
لاء
بلاش نبى
المفترض ان اللى كان بينا
ملوش علاقه
بدين ولا حتى اختيار
نبتدى تانى
الانتحار بالموت
ولا بالحياه
سؤال بديهى الاجوبه
لكنى عاجز
عن مجرد طرح معنى للفراق
يعنى
لو فرضنا
ان المسافه بين سواد عينى
وزرقه بحرها
دمعه
وان الزمن واحد
بيحب لاخر لحظه
تهميشك ليه
فيصمم يفتح قدسك
بالعجز الصادر منى
وبيأسك
تفتكرى
سرعة قذف امريكا لبغداد
وفرحنا
حتفسر فى قانون النسبيه
ولا حتأخر زحف الجيش المصرى
على كل حياتنا
الدين لله
وولائى لمين
للوطن المرسوم على ايدى بريزه
ناحيه النسر
وناحيه كتابه بعشره حلال
ولا لبياع البيره
اللى بيرضى يشكك
لما يحس بقصر الايد
تفتكرى
بكره حتبقى ايه
مدام
احساسى متغيرش
الربع جنيه
مبقاش بريال علشان خرموه
ولا قدروا ف نفس الوقت
يعالجوا كساد السوق
بس الغرابه
ان اللواء الشيخ لسه ساكت
ومقالش من اعمالكم
ولا حتى دكتور الحديد
قدر يحس بنقصه فجسمنا
من قله الاكل والضغط المبين
هو صحيح
الضغط ف امبابه
يفرق عن الضغط ف مدينه نصر
ولا متشابهين
حيشوفك الليله
كما حبيت
متهربيش
قالوا انه قدرك
وقالوا عنى عبيط
خليه يبوسك
يحضنك
يطفى حراره يوليو
ف شقاوه نيسان
خليه يبان
زى اللى ثاروا الشهر ده من كام سنه
واتحمليه
قدرك
ولازم تعرفيه
عشرين سنه
بنأجل الاحلام ونرضى بالفتات
عشرين سنه
بنجامع المناديل وفى القصر البنات
متفسريش معنى العرق
بالجهد او ب الالتزام
اللى سرق م الخوف
بيتشابه معاه
بس الاكيد
حيجيب اوام
صور البطوله
والفتوحات اللى خاضها
اسمعيه
وانتى عيونك مقفولين
واوعى ف لحظه تفتحى
ف يشوفنى فيهم
ب تخونيه
ف يبات عريس
العريس
الف مره
كل مره
كان عريس
يوليو 2001