حنين

[عادل عيد]

حنين

يا بيتنا ياللى كنت هناك
فاكرنى ولا ناسينى
بحن لعيشتى جوه حماك
وجدرانك تدفينى
وابويا وامى واخواتى
وايامى فى اركانك
وضحكاتى وشقاواتى
وشخبطى على حطانك
بحن لطبطبه امى
بحنيه على كتافى
وهى عليا بتسمى
وانا اللى غشيم ومتعافى
بحن لزغره من ابويا
عشان شافنى ماشى حافى
بحن لعركه مع اخويا
وننساها وما نتجافى
بحن لشربه الميه
من الحنفيه ف جنينتك
وغسلى كمان لرجليا
وشطفه ايدى من طينتك
وتمديدتى ف عصريه
وشامم ريحه لنجيلتك
بحن لشجره ضمتنى
وانا متدارى ف فروعها
بكل حنان وخبيتنى
كأنى فرع من نوعها
بحن لقطه حضنتنى
ولزقت فيا من جوعها
بحن لزحمتك ف العيد
وناس واقفه على بابك
وانا فرحان بلبس جديد
ويا بيت مليان بأحبابك
بحن كمان لسور وحديد
وطيبه قلب بوابك
بحن كمان لصوت ضفدع
ف عز الضلمه بينقنق
بصوته خشن ومتقطع
لحد الفجر ما يشقشق
وللصرصار بتاع الغيط
يرد عليه بصفاره
كأن فيه فرقه خلف الحيط
بتعزف ليا بمهاره
عشان انعس واروح ف النوم
ويخلص ف ثوانى الليل
ولما افتح عينيه اليوم
اقول يااااااااه... اما حلم جميل

دكتور
عادل عيد

[الشاعرمحمدأسامةالبهائي]

لأ

تمام .. تمام
يادكتــور عــــــــادل

عاش النفس وربنا يبارك لك

ويظله عامر بيت العيله

كتابة فارقة ... استمر

ربنا يوفقك وتشجينا

[سعيد حامد شحاتة]

بحن لعيشتى جوه حماك
وجدرانك تدفينى
وابويا وامى واخواتى
وايامى فى اركانك
وضحكاتى وشقاواتى
وشخبطى على حطانك
بحن لطبطبه امى
بحنيه على كتافى
وهى عليا بتسمى
وانا اللى غشيم ومتعافى
************
الله يا دكتور عادل
ذكريات جميلة وقصيدة سببت لى حالة من الاختناق الملئ بالشجن لما فيها من ذكريات
الله عليك والله

[عادل عيد]

كل الشكر للاستاذ اسامه ولصديقى العزيز سعيد شحاته

[ندى إمام عبد الواحد]

تحياتى
كلمات لها شجن وحنين بالفعل أعجبتنى
وربما تلك هى المرة الاولى من نوعها التى يذكر فيها الصرصار فى قصيدة شعر

[عادل عيد]

الاخت العزيزه ندى عبد الواحد: تحيه طيبه وبعد
فى البدايه اشكرك جدا على تعليقك الرقيق.
أسجل ايضا اعجابى بأسلوبك الراقى الحساس فى عرض وحهه نظرك.
بالنسبه للفظ الصرصار لا انكر ان ما قلتى خطر ببالى عندما قرأت القصيده بعد كتابتها ولكن قلت لنفسى ان العديد من الشعراء الفحول ذكروا العقارب والحيات والثعابين والخفافيش والغول وكانت هذه الالفاظ على بشاعه ايحاءاتها عناصر جيده ما دامت موظفه فى خدمه العمل ولا تشكل نشاز فى الجو الحسى العام للقصيده. وعلى اى حال صرصار الغيط هذه يختلف عن الحشره الاخرى المعروفه للعامه وبعدين هو كان عندى عازف ماهر فى فرقه موسيقيه محترفه.
تحياتى واحترامى للجميع

[عبد اللطيف بوعياد]

السلام عليكم ورحمة الله تعالى وبركاته

ادا كانت الحاجة ام الاختراع فان حنينك اخي الفاضل
الى بيتك القديم هو الدافع الرئيس لكتابتك لهده القصيدة
تحياتي القلبية