الشاويش والحرامى

[عادل عيد]

الشاويش والحرامى


الحرامى: صبح يا شاويشنا يا عسوله ... خد ولع واحد كلوباترا

الشاويش: ما بادخنش لكن مقبوله....خش عليا امورك تطرا

الحرامى: لينا مصلحه عندك نقضيها...وانت حبيبنا راجلنا العتره

الشاويش: فتح مخك يللا اديها..... دى الحاله ناشفه من فتره

الحرامى: ايه نشفها الله يهديها....داحنا نحبها اطرا واطرا

الشاويش: كان فيه ظابط طالع فيها....بيدقق فى الورقه ويقرا
كل امورنا يبص عليها.... عاوز يفهم اللى بيجرا

الحرامى: طب ماهو برضه حياكل منها.... انت وهو هتاخدو الاجره

الشاويش: لأ يا حبيبى ده عينه مليانه..... متربى ومن عيله واسره
وظروفه حلوه كمان مرتاحه..... مطمن على يومه وبكره
والادهى ان كمـــــــــان متدين..... بيخاف من ربنا والاخره

الحرامى: عارفه النوع ده زباله وفقرى..... مايعديش ناشفه ولا خضره

الشاويش: بس اهو راح وماعادش حيرجع.... جم وخدوه على سجن الحضره

الحرامى: ايوه السجن كمان انسب له..... هو بشغل المساجين ادرا

الشاويش: لا يا خفيف ماهو قلع البدله...... واخد حكم فوق السنه عشره

الحرامى: مين هو اللى عمل دى العمله..... ايه اللى حصل يا ولاد الفجره

الشاويش: عامل فيها شجيع بسلامته...مش خايف من العالم القادره
حاولو معاه زود فى ايامته... لقيو دماغه انشف من الحجره
قاموا جايين ماسحين بكرامته.....خلوه يعيش ايامه فى حسره
عملو بلاغ مضروب فى سيادته..... وحطوله فى عربيته كيس بودره
هاهاهاهاهاهاها


دكتور
عـــــــــادل عـــــــيد
22/11/2007