من الشعر العامي "هريتو قفايا"

[عادل عيد]

هريتوا قفايه

يا عالم كفايه
هريتو قفايا
وخفو ايديكو ياناس ع القفا
سرقتم عشايا
عصرتم حشايا
وغول الجشع عندكم ما اكتفى
نصرتم عدايا
وبعتوا العبايا
وخدها عملها الحاخام منشفه
سكنتم سرايا
واحنا عرايا
بنرعش وانتم هناك ف الدفا
ظلمتوا الولايا
وجاعوا الصبايه
وعشتوا حياتكو ف هَنا مترفه
وجبتم اذايا
وذلى واسايا
فى جره الم..اجراءات مجحفه
وزير الرزايا
بيحكى ف حكايه
وحبه كلام همبكه وفلسفه
يبرر جنايه
عملها معايا
بحدوته بايخه وكمان مقرفه
وقال دى البلايا
وشح الجرايا
سببها ان انتم عالم مسرفه
وطبعا خَوايا
وقلت قرايه
وجهلى بامورى وعدم معرفه
يخلينى غايه
لسوء النوايا
عشان عينى عميا وايدى مكتفه
ويفضل منايا
اشبع ضنايا
وارضى بلقمه متــــــــــجففه
والوص من شقايا
وفقرى وحفايا
وتفضل حياتى متـــــــــخلفه
وأتوه من عمايا
وأقبل وصايا
وافضل فى حاله خضوع مؤسفه
وبارفع دعايا
لربى ورجايا
يزيح البلاوى المتســـــــــــــتفه

دكتور
عادل عيد