مستنية صلاح الدين

[إبراهيم عبد السلام]

ألو
مين؟
انا فلسطين
مين، فلسطين؟
ايوة انت بتاع صلاح الدين؟
انت عارف صلاح الدين؟
واحد كدا مش عارفه كويس
بسمع عنه وعن حطين؟
أنا فلسطين
أم الاقصى
عارفه؟
اول قبلة وكمان تالت الحرمين
انت مقلتش انت مين
انا شاب عربي
يلا سلام وجعتي دماغي يا فلسطين
عمالة تقولي اول قبلة
احنا هنعمل ايه باتنين
واحدة كفاية
احنا اصلا مش فاضيين
ويعني ايه تالت الحرمين
كفاية يا ستي علينا اتنين
طيب قبل ما تقفل
ممكن اسأل
انتم فين
احنا مين؟
شباب العرب؟
احنا كتير
مش في مكان واحد قاعدين
شوفي يستي
فينا كتير قاعدين عالقهوة
واحد اهو بيضرب حجرين
والتاني يلف سجارتين
وناس بتتفرج على كورة
وناس على السينمات رايحين
والفضائيات شغلانا
بدل المسلسل فيه عشرين
انت عطلتيني كفاية
يلا سلام بقى يا فلسطين
سلام ياسيدي
خليكو تايهين
بكرا هيرجع تاني حبيبي
وينادي يقول يا فلسطين
وساعتها انا هبكي وهصرخ
وقوله غبت سنين وسنين
حبيبك؟
مين؟
منا قلتلك صلاح الدين؟
يستي سبيني اشوف الموزة
قاعدة على الشات من ساعتين
أخرتيني عليها كتير
انت وعمي صلاح الدين
يلا روحي شوفيه راح فين
وسيبينا وخلينا عايشين
عايشين؟
انتم متو بقالكو سنين
زي ما قال الباشا بتاعكم
انتم عايشين ومش عايشين
انتو خلاص بقيتو اموات
خليكو يا شباب تايهين
انا هستنى الجيل التاني
اكيد فيه صلاح الدين
ألو
انت مين
انا يوسف وبينادوني صلاح الدين
عندي يدوبك ست سنين
بصلي وبحفظ قرآن
عارفة، انا دلوقت حافظ جزئين
انا مش عارفك. انت مين
ايوا نسيت انا فلسطين
ايو انا عارفك
فيكي القبلة الاولى
وفيكي تالت الحرمين
بس انا تايهة
انا عارف
خطفوكي الملاعين
بس استني واوعي تخافي
احنا قريب قوي راجعين
انتم؟ مين؟
منا قلتلك
بينادوني صلاح الدين
وكمان لازم تفضلي فاكرة
الخير فينا ليوم الدين