قصة من بريد الأهرام

[monashazly]

أنا آنسة عندي‏35‏ سنة وماشية في‏36,‏ باشتغل مدرس مساعد في كلية التمريض بإحدي الجامعات‏,‏ كنت عايزة أرد علي الانسة اللي عندها‏27‏ سنة وبعتت خايفة من انها توصل لسن‏30‏ وما تتجوزش‏.‏

هي كتبت انها يأتي إليها عرسان بس مش بيحصل نصيب‏,‏ بس علي الاقل شافت عرسان قدامها واتخطبت مرة‏.‏

إنما انا مثلا مش بيجيلي عرسان ولا عمر دخل بيتنا عريس أبدا ولا عمر اتقرا فتحتي ولا اتخطبت ولا حتي حد شافني واتكلم عليه وكل ما أحب انسان واتعلق به أكتشف انه مرتبط‏,‏ وتخيل حضرتك مدي المعاناة اللي بأعانيها عشان اضغط علي نفسي وانهي الحب ده‏,‏

لأن في معظم الأحوال بيكون من طرفي‏,‏ تصدقني لو قلتلك عمري ما حسيت ان فيه رجل اتشدلي ولا حبني‏,‏ ولا حتي حسيت ان حد صمم عليه واتقدم‏,‏ بكل المقاييس مافيش حد بيجيلي خالص وأديني اهو مقربة علي الاربعين وبردوا اعوذ بالله من كلمة انا بشهادة جميع الناس أخلاقي عالية وحلوة ومعاملتي طيبة للناس‏,‏ يعني مش منفرة وانا نفسي ابعت صورتي لحضرتك كإثبات بس عشان مش أتفهم غلط‏,‏ عارف حضرتك انا شكلي اصغر من سني والله‏,‏ بس بقالي ييجي سنة أهو كل الناس في اي مكان تقوللي يامدام‏,‏ تخيل الإحساس ساعتها يكون ايه يعني انا مش لابسة لبس يعني يبان انه لبس واحدة عندها‏60‏ سنة‏,‏ والله بشهادة الناس بردوا لبسي شيك ومعتدل جدا لكن كل اللي يشوفني يقوللي يامدام‏,‏ عارف حضرتك انا تعبت والله عمري ما مشيت مع رجل ولا قابلت ابدا بفضل الله اقول انا كده هعذب نفسي حتي لو ان الوضع مش غلط‏,‏

تصدق ان اللي حس بيه واحد أصغر مني بـ‏13‏ سنة وحضرتك عارف الباقي طبعا حبينا بعض جدا وانسان فعلا زي ما بتمني لكن كشكل وحياة مش هننفع لبعض والموضوع كان شبه مقفول من الأهل من الطرفين‏,‏ وكمان أنا فضلت البعد لاني حاسة باني ماشية في طريق مالوش اخر‏,‏ نفسي اعرف لما العريس بيتقدم لعروسة بيقولها ايه ولا بيتكلموا في ايه وبيقعدوا مع بعض ازاي‏,‏ أنا معرفش لأني عمري ما قعدت مع عريس أبدا‏,‏ وفوق كده بقيت المدام يعني وجع كده مستمر عارف حضرتك الناس بتستغرب ان واحدة زيي مش بيجيلها عرسان خالص‏,‏ وكل اللي يتكلم يقوللي حطي واطي شوية مش دكتورة في الجامعة طالعة في العاشر‏,‏ كل الناس فاكرة وبكل أسف اني عايزة واحد فوق أوي ومستنية الفيلا والعربية مع ان العكس والله‏,‏ يعني تخيل حضرتك كل اللي انا فيه ده انا دايما بحمد ربنا لكن بعذر نفسي لاني بشر‏,‏ غصب عني دايما بأعيط‏,‏ أعمل ايه مش مكتوبلي النجاح مع أي انسان ودايما بادعي ربنا يوفقني ويهديني ويبعد عني الوساوس‏,‏ لان عارف حضرتك الحاجات دي لما تتجمع كلها مع بعض في وقت معين كده بتبقي عاملة زي الابر بجد تخيل حضرتك هي لو مرت بكل الآلام دي هتعمل ايه يعني‏,‏

انا علي كدة انتحر بقي أنا حاليا بعمل في الدكتوراه وبشغل نفسي داي ا بأي حاجة تفيدني بس طبعا غصب عني بفكر‏,‏ ودايما باحمد ربنا وبادعي لنفسي بالصبر جدا يا أستاذ خيري يعني هي لو شافتني هتحس بفرق كبير أوي بين حياتي وحياتها‏,‏ ده يعتبر فرق شاسع بيني وبينها‏,‏ والله انا نفسي أنها تعرف حياة غيرها ازاي عشان هتسجد شكرا لله‏,‏ والله علي انها علي الاقل بيجيلها حد ولسة العمر قدامها‏,‏ عارف حضرتك انا كنت زمان كل اللي يتكلم انت مش بتوافقي ليه اتكسف مش عارفة ارد‏,‏ دلوقت قلت الصراحة أحسن وبقيت اقول مافيش حد بيجي لان الناس فاكرة اني باطلع القطط الفاطسة في العرسان اتمني من ربنا يعينني دايما ويقويني يارب وفعلا هي في نعمة مش حاسة بيها علي الاقل شافت اعجاب من حد انما انا لا‏,‏ ربنا ينور لها تفكيرها‏,‏ انا أسفة اني كتبت بالعامية حسيت اني عايزة انطلق وافضفض معلش انا احترم رأي حضرتك جدا في انك وضعت حد لموضوع رسائل الشباب اللي بتيجي عشان يتقدموا للبنات اللي بتبعت ربنا عالم اني والله ببعت‏,‏ مش عشان ألاقي عريس عن الطريق ده فعلا‏,‏ لكن عشان بس تحس صاحبة رسالة الأسبوع الماضي بالنعمة اللي هي فيها‏.‏

من رسالة لبريد الأهرام يوم الجمعة الماضي

شخصيا أرى أن كل من تزوجت و سعيدة في حياتها ان عليها ان تحمد الله و تسجد له شاكرة كل يوم ، وكل من لم تتزوج بعد ان تدعو الله أن يرزقها زوجا صالحا خلوقا و يعوض صبرها خيرا

اللهم عوض صبر كاتبة هذه الرسالة خيرا و اثبها على صبرها في الدنيا و الأخرة ، فانا أقدر احساسها فهو إحساس مؤلم فعلا ،فمن يتقدم لها العرسان ثم لا يحدث نصيب وضعها أرحم كثيرا من كاتبة هذه الرسالة فهي على الأقل قد أحست أنها أنسانة قابلة للتفكير فيها اما كاتبة هذه الرسالة فكان الله في عونها و أعانها على وضعها .