المساعد الشخصي الرقمي

مشاهدة النسخة كاملة : الراااائع صلاح جاهين


نادية فريد لطفي
06/02/2007, 02:42 AM
انا كل يوم أسمع ........ فلان عذبوه


أسرح في بغداد و الجزاير واتوه


ما أعجبش م اللي يطيق بجسمه العذاب


و اعجب من اللي يطيق يعذب أخوه


عجبي !!!
نادية فريد لطفي
06/02/2007, 02:44 AM
خرج ابن آدم من العدم قلت : ياه


رجع ابن آدم للعدم قلت : ياه


تراب بيحيا ... وحي بيصير تراب


الأصل هو الموت و الا الحياه ؟


عجبي !!!
نادية فريد لطفي
06/02/2007, 02:46 AM
ضريح رخام فيه السعيد اندفن


و حفره فيها الشريد من غير كفن


مريت عليهم .. قلت يا للعجب


لاتنين ريحتهم لها نفس العفن


عجبي !!!
نادية فريد لطفي
06/02/2007, 02:48 AM
ياما صادفت صحاب و ما صاحبتهمش


و كاسات خمور و شراب و ما شربتهمش


أندم علي الفرص اللي انا سبتهم


و الا علي الفرص اللي ما سبتهمش


عجبي !!
نادية فريد لطفي
06/02/2007, 02:51 AM
الكون ده كيف موجود من غير حدود


و فيه عقارب ليه و تعابين ودود


عالم مجرب فات و قال سلامات


ده ياما فيه سؤالات من غير ردود


عجبي !!!
نادية فريد لطفي
06/02/2007, 02:53 AM
أنا شاب لكن عمري ألف عام


وحيد لكن بين ضلوعي زحام


خايف و لكن خوفي مني أنا


أخرس و لكن قلبي مليان كلام


عجبي !!!!
نادية فريد لطفي
06/02/2007, 02:55 AM
يا باب يا مقفول ... إمتي الدخول


صبرت ياما و اللي يصبر ينول


دقيت سنين ... و الرد يرجع لي : مين ؟


لو كنت عارف مين أنا كنت أقول


عجبي !!!
نادية فريد لطفي
06/02/2007, 02:58 AM
أحب أعيش ولو في الغابات


أصحي كما ولدتني أمي و ابات


طائر .. حوان.. حشرة .. بشر ..بس أعيش


محلا الحياة.. حتي في هيئة نبات


عجبي !!
نادية فريد لطفي
06/02/2007, 03:09 AM
سهير ليالي و ياما لفيت و طفت


و ف ليه راجع في الضلام قمت شفت


الخوف ... كأنه كلب سد الطريق


و كنت عاوز أقتله .. بس خفت


عجبي !!
الشاعرمحمدأسامةالبهائي
07/02/2007, 01:12 AM
قول ياجاهين واشجينا
غناك الحلو.... غنينا
وغناك المر.... غنينا
حفظنا شعرك وف عنينا
والليلة لمتنا والسامر حوالينا
وأول الكلام مبتداه سلام
وأخر الكلام منتهاه سلام
ومن هنا بابعتلك السلام
الف رحمه ونور عليك وعلينا
(محمدأسامة)
وإلى العملاق الكبير عمنا
( صلاح جاهين )
(يشجينا )
شوقي اد ايه
********

يا بخت من يقدر يقول

واللي ف ضميره يطلَّعه

يا بخت من يقدر يفضفض بالكلام

وكل واحد يسمعه

يقف في وسط الناس ويصرخ : آه يا ناس

ولا ملام

ييجى الطبيب يحكي له ع اللي بيوجعه

يكشف مكان الجرح ويحط الدوا

ولو انكوى

يقدر ينوح

وانا اللي مليان بالجروح

ما اقدرش اقول

ما اقدرش ابوح

والسهم يسكن صدري ما اقدرش انزعه

شوفي قد إيه؟

احنا النهارده إيه في أيام السنه

شتا والا صيف

وفين أنا

إيه اللي وصّلنى هنا

أنا صاحب البيت والا ضيف

صوتي انحبس

ما اقدرش اقول

ما عرفش حاجه عشان اقول

ما اعرفش غيرك انتي بس

يا بت ياللي في حبك العقل اتهوس

مكان غريب

كأنه سجن كأنه مخدع لحبيب

كأنه بير

شباك حديد وعليه ستاير من حرير

والريح بينفد منه زي المسامير

الريح عوى

قلبى انقبض

قلبى اتلوى

الشمس تلج اصفر شعاعها صاروخ هوا

الضلمه تلج اسود كتير

ألوف ألوف القناطير

خبيني في شعورك يا بت

أحسن عروقى اتخشِّبت

شعرك خشن زى الحِرام الصوف يا بت

خبيني فيه م الزمهرير ..

ونَيِّميني في السرير

دخل النبى بردان خديجه لَفِّته

حَطِّت عليه غطيان لحد ما دَفِّته

دخل النبى بردان وقال: فين الغطا

البسمة غطت شفِّته
نادية فريد لطفي
08/02/2007, 04:40 AM
شعر و شجن
رائع و أكثر من رائع
هل يمكن مشاركة الجميع هنا
صلاح جاهين وحده أسس جمهورية للشعر
الله يرحمه و يجعل مثواه الجنة
آمين يا رب
داليا أحمد عبد الرحيم مصطفى
07/05/2007, 03:44 PM
الرباعيات الكاملة
http://cheikh-imam.net/A_08_Roubaiyyat%20Jaheen/Roubaiyyat%20Jaheen.htm
الشاعرمحمدأسامةالبهائي
07/05/2007, 04:53 PM
الرباعيات الكاملة
http://cheikh-imam.net/A_08_Roubaiyyat%20Jaheen/Roubaiyyat%20Jaheen.htm

الأستاذة الفاضلة والأخت الكريمة
وإن شاء الله عن قريب نعلنها ونباركها كلنا
الدكتورة
داليا عبد الرحيم مصطفي

نشكرك
كل الشكر علي هذه المشاركة
برابط الرباعيات للراحل الحي
صلاح جاهين
بن مصر وحته من ترابها

مع خالص تحياتي
أخيك
الشاعر
محمدأسامة
صالح العرجان
16/05/2007, 08:27 PM
مع أولى مشاركاتي

احببت لها أن تكون هنا بين طيات هذا المتصفح العامر بشعر فريد من شاعر

كون دولة للأبداع

وأجبرنا على أن نكون مواطنين يقطنونها !


رد ود