ارتفاع طارئ ف ضغط الدم

[ماجد كمال ابادير]

عمال بتشبك .. كل اللي قريتة ...
وترص اللي كتبته .. طابور..
كام سطر كتبته .. ؟؟ عجبته ..
كام سطر قريته .. ونخشش.. جوا نافوخك ...
مش راح تلحق .. تعدل حاجة ..
ده انت يا دوب.. بالتيلة تلحق وتبوظ ..حاجة ..
يا بو راس مليانة كتوبة علي الاخر..
متلخفن فيها التواريخ ..
حتي اغاني الست ..حافظها حتت..
من غير عناوين...
واما لمحتك ماشي زمان في مظاهرة ..
شفتك ..ساكت ..
عمال تقرا الهتافات ..وتدور..
وتدوخ علشان تعرف ايه عايزينه ... الهتيفة ...
حبة حرية زيادة .. ولا لقمة عيش ...
مخروم القلب محدش فينا عرف يملاه ...
لا يقين .. ولا شك ..
طول عمرك نمرة 2 ...
حتي ف لعب الكورة زمان ..
وف ترتيب اخواتك ...
وسطاني ....
بس مكنتش عوال هم ...
ولا عمري لمحتك .. وانت اناني ...
بس اللي انا مستغرب ليه ..
ان المكتوب ف شهادة موتك ...
ان السبب الواضح جدا...
محض علو مفاجئ.. جالك ..
جري بسرعة ف ضغط الدم ...!!!!!!!!!!!!!!!1