نص الوطن عسكر ...شعر/ سمير الأمير

[سمير الأمير]

نص الوطن عسكر
إلى روح محمد السقا شهيد مظاهرات تأييد انتفاضة الأقصى فى مدينة الإسكندرية
****
يا قلب شاعر فى مسيرة الجامعة
يا خدك حماس الشعر
تهتف كأنك حى
كل البلاد تسمعك
ومصر مش سامعه
مخنوقه بين ضلمتين
وانت بتنزف ضى
نص الوطن عسكر ونصه عبيد
بتخبى روحك ليه تروح لبعيد
دمك هدر يا محمد السقا
هتفت للقدس ماحلمتش تجيب شقه
عشان كده بتموت عشانها شهيد
بتموت يا واد من غير ما تسأل حد
بتموت ومتهيألك انك واخدها بجد
مجاش فى بالك يا واد
اسكندرية و رام الله تحت نفس الحصار؟
جيش الدفاع هوه فرق الأمن
مافيش خجل ولا احساس قوى بالعار
دم الشهيد لو للكرامه حن
تتفك عقدتنا بأغنيه!!

[الشاعرمحمدأسامةالبهائي]

بتموت يا واد من غير ما تسأل حد
بتموت ومتهيألك إنك واخدها بجد
مجاش فى بالك يا واد

إن السواد الأعظم شيكابيكا
واخدين دليلهم أمريكا
فوق الشعوب كل الحفر
وكل مواسير الميه الضاربه بتخوخ تحت الأرض
والونس الي بيملا شوارع مصر من عماويد النور
بيخطف خيرة شباب البلد
ومش صاين لكثير م البنات عرضها
هي دي أرض مصر ؟ ولا مش أرضها؟

****
واصل ياسمير
ولك أجمل تمنياتي علي الدوام
أخوك
محمدأسامة

[عبد العلي فيلالي بالحاج]

آه يا بو سمرة ومين بقالو نفس للغنا
ويا مين يقرا يا صاحبي يسمع لنا
لما نقول دا صح يا عالم ودا غلط
وكانك بتكلم نفسك ولا كوم زلط
مرة اخرى اقف هنا للمتعة الشعرية واقول كمان وكمان يا بو سمرة:good: :fl:

[د. فوزى ابودنيا]

اخى سمير
سامح خربشاتى هنا

نزفت الوردة عبيرها
وهي مش راضية
ولم حس بيها حد
عبيرها مرمى اودام عنيها
يشربه التراب
معبهوش حتى
ف ازازة الحاجة الساقعة
دموعها نازلة متقطرة بالحزن
وهى مابين اسطوانات مفرمة الزهور
مش عارف بتبكى م الالم
ولا بتبكى
على نزف العبير منها
ربك ف عونها

[سعيد حامد شحاتة]

نص الوطن عسكر
إلى روح محمد السقا شهيد مظاهرات تأييد انتفاضة الأقصى فى مدينة الإسكندرية
****
يا قلب شاعر فى مسيرة الجامعة
يا خدك حماس الشعر
تهتف كأنك حى
كل البلاد تسمعك
ومصر مش سامعه
مخنوقه بين ضلمتين
وانت بتنزف ضى
نص الوطن عسكر ونصه عبيد
بتخبى روحك ليه تروح لبعيد
دمك هدر يا محمد السقا
هتفت للقدس ماحلمتش تجيب شقه
عشان كده بتموت عشانها شهيد
بتموت يا واد من غير ما تسأل حد
بتموت ومتهيألك انك واخدها بجد
مجاش فى بالك يا واد
اسكندرية و رام الله تحت نفس الحصار؟
جيش الدفاع هوه فرق الأمن
مافيش خجل ولا احساس قوى بالعار
دم الشهيد لو للكرامه حن
تتفك عقدتنا بأغنيه!!


________________________
صديقى العزيز
القصيدة أكثر من رائعة
أنت مبدع تجيد إختيار الحرف ببراعة
مع خالص تحياتى
سعيد:good:

[سمير الأمير]

الأخ
سعيد حامد
شكراً لك
أتمنى أن احظى بتعليقاتك دائماً
وبمرورك على مدونتىhttp://www.samirelamir.blogspot.com/

[سيدة الشولي]

الأخ سمير
لامست أوجاع الأمة بكلماتك الطيبة
أشاركك الإحساس..وتضامناً معك
إليك كلماتى المتواضعه:
--------

دى حلقة وبتضييق علينا
يمكن
قلة إيماننا؟
ولا طيلة سوكاتنا؟
ورضانا لأى منكر
وشيطان راضى علينا!
ــــ
حلقة وبتضييق علينا
بنتعالى
ليه في دعانا؟
ونفوت اللي دعانا
وحلالنا ليه في حرامنا؟
والرب نقول ناسنيا؟!
ـــــ

حلقة وبتضييق علينا
من
صحبة المصالح؟
وطوارئ المذابح
وقانون في أي خيبة
حامينا ..حرامينا؟!!!
ـــــ
حلقة وبتضييق علينا
من قلة
حيلة لينا؟
ولا عهر المدينة؟
ولا من موت ضميرهم
زوار شرم ومارينا؟
ــــــ
حلقة وبتضييق علينا
بيبيعوا
ليه في أصولنا؟
بالموت عايشين حياتنا
وكيماوي ليه في بلدنا؟
يقلع زهرة إدينا !!
ــــــ
حلقة وبتضييق علينا
بنطاطي
للي باعنا
ونخاف من أي مدنه
وعسكر الحكومة
غير عسكر المدينة؟!!
ــــــ
حلقة وبتضييق علينا
في
الفجر يدق بابك
بوشاية من صحابك
تلقى أمر اعتقالك
وقابلني لو تيجينا
ــــــــ
حلقة وبتضييق علينا
تقفل
خاشمك يا صاحبي
ووعاك تقول يا صاحبي
في مصابك ليه داعينا
صُماً ..بُكم تلاقينا
ــــــــ
حلقة وبتضييق علينا
تشحت
عليك حكومتك
وبعظمة تسد حلقك
تبلعها غصب عنك
سدد يا أبن اللذينا
ـــــــــ
حلقة وبتضييق علينا
حنلاحق
فين يا سيدنا
م الهم اللي محاوطنا؟
ومرتب مين يجيرنا
وبقاق مفتوحة لينا؟!
ــــــــ
حلقة وبتضييق علينا
الطب
بقى استشارة
وشيء يفقع مرارة
تلف كعب داير
بحرك بدون سفينه
ــــــــ
حلقة وبتضييق علينا
الفول
بقى من نصيبك
واللحمة إن كان ف عيدك
شممنى يا جارى أكلك
ما أنت منا وعلينا

---------
تحياتى
أختكم
سيدة الشولى

[سمير الأمير]

جميل شعرك يا سيده-- سعدت بقصيدتك - ولك مودتى

[محمود الديدامونى]

سميرالأمير
قصيدتك من عنوانها إبداع
نص الوطن عسكر
ونصه عبيد
بالضرورة
وبين ضلمتين
الله
جميل هذا الدفق الشعورى يا عم سمير

[سمير الأمير]

اشكرك يا محمود وبانتظار ما وعدت به