قصيدة للشاعر الكبير عبد الرحمن الأبنودى يحيى من خلالها ثورة 25 يناير
قصيدة الميدان للشاعر الكبير عبد الرحمن الأبنودى يحيى من خلالها ثورة 25 يناير
أيادى مصرية سمرا - ليها فى التمييز
ممدودة وسط الزئير .. بتكسر البراويز
سطوع لصوت الجموع .. شوف مصر تحت الشمس
آن الآوان ترحلى .. يا دولة العواجيز ...
-------------
عواجيز شداد .. مسعورين .. أكلوا بلدنا أكل
ويشبهوا بعضهم .. نهم .. وخسة وشكل
طلع الشباب البديع .. قلبوا خريفها ربيع
وحققوا المعجزة ... صحوا القتيل م القتل
--------------------
اقتلنى .. قتلى .. ما حيعيد دولتك تانى
باكتب بدمى حياة تانية .... لأوطانى
دمى ده ولا الربيع ..؟ لاتنين بلون أخضر
وبابتسم .... من سعادتى والا أحزانى ..؟
-----------------------
تحاولوا .. ما تحاولوا .. ما تشوفوا وطن غيره
سلبتوا دم الوطن .. وبشيمتوا من خيره
أحلامنا ... بكرانا ... أصغر ضحكة على شفة
شفتوتشى صياد يا خلق ... بيقتله طيره ..؟
--------------------------
السوس بينخر وسارح ... تحت إشرافك
فرحان بيهم كنت ... وشايلهم على كتافك
وأما أهالينا .. من زرعوا وبنوا وصنعوا ...
كانوا مداس ليك .. ولولادك .. وأحلافك
-------------------------------
يا مصر ..قام العليل .. رجعت له أنفاسه
وباس جبين الوطن .. مال الوطن باسه
من قبل موته بيوم ... صحوه أولاده
إن كان سبب علته ... محبته لناسه ..
------------------------------
الثورة .. فيضان قديم .. محبوس مشافوش زول
الثورة لو جد .. متبانشى فى كلام أو قول
تحلب وتعجن فى سرية تفور فى القلب
وتنغزل فتلة فتلة .............فى ضمير النول
--------------------------------
ماتخافش على مصر يا با ...مصر محروسة
حتى من الطغمة دى اللى فينا ..... مدسوسة
ولو أنت أبوها بصحيح .. وخايف عليها قوى
تركتها ليه بدن .......... بتنخره السوسة ؟
-----------------------------------
وبيسرقوك يا الوطن .. قدامنا .. عينى عينك
ينده بقوة الوطن ، ويقوللى : قوم فينك
ضحكت علينا الكتب ، بعدت بينا عنك
لولا ولادنا اللى قاموا يسددوا دينك
------------------------------------
لكن خلاص يا وطن ....صحيت جموع الخلق
قبضوا على الشمس بأيديهم وقالوا : لأ
م المستحيل يفرطوا عقد الوطن تانى
والكدب تانى .. محال .... يلبس قناع الحق !!
----------------------------------
بكل حب الحياة .. خوض فى دم أخوك
قول : إنت مين ؟ .. للى باعوا حلمنا وباعوك
وأهانوك ، وذلوك ، ولعبوا قمار بأحلامك
نيران هتافك .. تحرر صاحبك الممسوك
------------------------------------
يرجع لها صوتها مصر ، تعود ملامحها
تاخد مكانها القديم ، والكون يصالحها
عشرات سنين تسكنوا بالكدب ف عروقنا
والدنيا متقدمة ........... ومصر مطرحها
-----------------------------------
كتبتوا أول سطور فى صفحة ثورة
وهم ... علما وخبرة مداورة ومناورة
وقعتوا فرعون ، هرب من قلب تمثاله
لكن "جيوشه" مازالوا يحلموا ببكره
-----------------------------
صباح حقيقى .. ودرس جديد قوى فى الرفض
أتارى للشمس صوت ، وأتارى للأرض نبض
تانى معاكم ... رجعنا نحب كلمة مصر
تانى معاكم ... رجعنا نحب ضحكة بعض !!
------------------------------
مين كان يقول إبننا .. يطلع بنا م النفق !!
دى صرخة ولا غنا ؟.. وده دم والا شفق ؟
أتاريها حاجة بسيطة الثورة يا أخوانا
مين اللى شافها كده ؟.. مين أول اللى بدأ ؟
-----------------------------
مش دول شبابنا اللى قالوا كرهوا أوطانهم ؟
ولبسنا توب الحداد .. وبعدنا قوى عنهم ..؟
هما اللى قاموا النهارده يشعلوا الثورة
ويصنفوا الخلق : مين عانهم ، ومين خانهم !!
-------------------------------
يادى الميدان اللى حضن الفكرة .. وصهرها ..
يادى الميدان اللى فتن الخلق وسحرها
يادى الميدان اللى غاب اسمه كتير عنه
وصبرها ما بين عباد عاشقة وعباد كارهة
----------------------------
شباب .. كإن الميدان .. أهله وعناوينه
ولا فى الميدان "نسكافيه" ولا "كابتشينو"
خدوده عرفوا جمال النومة ع الأسفلت
والموت عارفهم قوى ... وهم عارفينه ..
-----------------------------------
لا الظلم هين يا ناس .. ولا الشباب قاصر
مهما حاصرتوا الميدان .. عمره ما يتحاصر
فكرتنى يا الميدان بزمان وسحر زمان
فكرتنى بأغلى أيام .... فى زمن ناصر !!
--------------------------
شايل حياتك على كفك ... صغير السن
ليل بعد يوم المعاناة ... وإنت مش بتئن
جمل المحامل ... وإنت غض باتعجب
إمتى عرفت النضال ؟ إسمحلى حاجة تجن !!...
-------------------------------------
أتاريك جميل يا وطن مازلت .. وهتبقى
زال الضباب .. وانفجرت بأعلى صوت : لأه
حرضتنا نبتسم ... ودفعت إنت الحساب
وبنبتسم .... بس بسمة طالعة بمشقة !!
----------------------------
فينك يا صبح الكرامة الا البشر هانوا
وأهل مصر الأصيلة .. إتخانوا وإتهانوا
بنشترى العزة تانى .... والتمن غالى
فتح الوطن للجميع ... قلبه وأحضانه !!
------------------------------
الثورة فيض الأمل ...وغنوة الثوار
الليل إذا خانه لونه .. يتقلب لنهار
ضج الضجيج بالندا ... إصحى يا فجر الناس
فينك يا صوت الغلابة .. وضحكة الانفار !؟
----------------------------------
وإحنا وراهم أساتذة خايبة .. تتعلم
ازاى نحب الوطن .. وإمتى نتكلم
طال الصدى قلبنا ، ويئسنا من فتحه ..
قلب الوطن قبلكم .. كان خاوى ومضلم ..
-------------------------------
أولنا فى الجولة .. لسة جولة .. ورا جولة
ده سوس بينخر يا بويا فى جسد دولة
أيوه الملك صار كتابة .... إنما أبدا
لو غفلت عيننا لحظة .. حيقلبوا العملة
-------------------------------
لكن خوفى مازال جوه الفؤاد ..يكبش ..
خوفى اللى ساكن شقوق القلب ومعشش
يقوللى مش راح يسيبوا ، ولسه هيبقوا
وهيلاقولهم سكك .. وبيبان ما تتردش ..
----------------------------
وحاسبوا قوى م الديابة اللى فى وسطيكم
وإلا تبقى الخيانة ... منكم .... فيكم
الضحكه ع البق .. بس الرك ع النيات
فيهم عدوين أشد من اللى حواليكم ...[/CENTER]
عبد الرحمن الأبنودى
