فراشات بتموت في تمر حنة(ايمن عباس)

لملمي بذور الوجع من جوه تكويني
خلي السنين الصعبة دي تفوت
انتي اللي عاشقة
واللا .انا المكبوت
هسيس نخلك بيوت
عنين حلمك تابوت
يا ام موت بينزف في شراييني
صبحي اللي مجاش واقف بعيد
قطر المحطة بيصفر
بيخش في التجاعيد
وش الحقيقة كالح
يا مرشرشة الجرح بالمالح
انا عيل صغير ..
بينسج الحواديت
وانا عنكبوت رهيف .....متشعلق علي باب حديد
قلبك المسكوك بجنازير وسنين وصداا وريح
معتش طالع في سما حلمي ضريح
معتش نازل في طيني مسيح
كل تكويني خيوط /واهية/وواهمة/ومتغربة /كل عمري كسيح
.................................................. .................................................. .................
من عند استلاب الحلم في الحدوتة
بتموت كل الغناوي مكبوتة
وانا وانتي ضدين
وماشين
لا صوتنا .......هيضمه حلم
ولا.........هيجمعنا حنين
افترقنا/كنار وجنة
وفراشات بتموت في تمر حنة