وبقولك يا بنتي بقلم:منى حمدي

وبقولك يا بنتي بقلم:منى حمدي
اللى يرضى يا بنتي يعيش
إياك يا بنتى تسخطي وتنكرى نعمة ربنا اللي مبتنتهيش
اللي يمنح واللي يمنع .واللي يحن لما قلبك بالألم يئن
هو بس اللى تخضعي له.وغيره متعبوديش
اللى يرضى يا بنتى يعيش
شوفي حال الأرامل والغارمات والفاقدات.ولا إنتى مبتشوفيش
شوفي العوزة والفقر والقهر.ولما تمدي إيدك متلاقيش
شوفي كدة الوجوه الحزينة .والقلوب المتغربة. والأفاعي والعقربة. وأنت فى جنة ونعمة فمتتبطريش
اللي يرضى يا بنتى يعيش
أنت أم وحضنك يضم ويمحى كل هم .وفى خيرك طيورك تعيش .ولا أنت فيهم مبتفكريش
أنت ميزان البيت الحساس،أنت النور والقمر والشمس.أنت صدق المشاعر والإحساس.أنت الفضة والذهب والماس.أنت روح الحياة فى النفوس فمتبخليش.
اللي يرضى يا بنتي يعيش
أنت لأليفك ونس ،وحضن يسند عليه من الكبد.أنت شجرة ظليلة.أنت فى مملكتك الملكة الجميلة.فاحرسي عشك ولا تغشك وجوه الناس الزائفة .فمتضعفيش.
اثبتي يا بنتى ومتهربيش.
ارضي بالنصيب . فالقدر غلاب،والقلب كداب لما يرميك فى بحور الوهم ،فاستعيني بالله ومتخوضيش.
اللي يرضى يا بنتي يعيش
لو أي نعمة اتحرمتى منها .شوفي غيرها كده هتلاقي نعم متمرمغة فيها سيادتك .ولو عديتي فيها متتحصيش
إياك تفكري إنك تغيري،علشان يا بنتي أول لمسة فيك مبتتنسيش.
اتحملي الظروف .وعيشى بالشرف والفضيلة .ومن غير الله متخافيش.
اللي يرضى يا بنتي يعيش
قدري الأمور .وضحي بكل شيء وأي شيء.لأن أي حاجة جنب حضن سندك وضناك متساويش
يا بنتي الحياة سكة طويلة بنعيشها فى يوم وليلة.لكن الجميلة تفضل جميلة.والردية تفضل ردية. خلى نفسك أبية وخليكى مرفوعة الراس ومتتحنيش
اللى يرضى يا بنتي يعيش
أوعي يغريك شيء،ولا يقهرك شيطان،ولا إنس،ولا جان.وأمام الإغراء متضعفيش
عاوزة تبقى وتبقي ويشاوروا عليك كالنجمة عالية وغالية.
خليك ينبوع الحنان والحكمة متنضبيش.
حاجة واحدة متأكدة أقولها لك أن الروح الحلوة فيك .بالسماحة والعفو والتجاوز متنطفيش
هتملكي قلب رفيقك لما تمسكي ايده بحنان الأم ،وغرام الرفيقة.ومشاعرك الرقيقة هتغيره ويصبح كأنه الفارس اللى خطف الأميرة فى قصر الحب .ومن غيرك مش هيعرف يعيش.
ويا بنتي اللى يرضى يعيش
أنت شايفة ولا مبتشوفيش.

بقلم :منى حمدي