يمـــوت ويتفــلــق

يمــوت ويتْفَــلَق

يمـوت و يتْـفَـلَق
مَقَـص بدون رَنيـن
بَقَصْقَصْ بو الـوَرَق مِنْ طَـرْحِ الجَـرانين
وابْنى بعِلْـوُه مَراكِب أسـاطيل فى المواكِب
تموت من الغَــرَق مِـنْ حِمْـلِ العناوين
و المكتوب اللى راكِـبْ
و تمـوت...
فِ سكوت
تموت وتتفلق

و أقَصْقَص بو الوَرَق من دَوْريّات قديمـه في فنون المكلمه
واعْمِلْ بُو صَواريخ
تـتبعتر فى السما ترسم لي قوس الطيف تتشد للمرّيخ
وِفْ حُضْـنُه تتْرَمَى .... يمكن هواه نضيف
ترصد خطايا الأرْض بالطول كدا والعرْض
تتصَمّ وتتعَمَى من أحزانها الأليمه من أصْوات الصِّريخْ
و تموت... ف جـمود... تموت و تتفلـق

و مقصِّى دا فيه أنين
مسنون كِدا من سنين .. مشحون وبدون رنين
و بيصرخ في القلق
بأقصقص بو الورق حَوالين العَناوين و أضمُّـه ف بَراويز
م الظّلم بتتمزَق تتفلّق م الأنين لمّا يضيع العَـزيز
و الغالى يتسَرَق

يتخلخل نوح حيطان تِتْـزلزل الجدران
و بَهيّتْنا الأبَـيّه يسْقَط منها الحلق
ويطيح منّي الورق نُصُّـه يطير يتحَرَق
أمّا النـُّص اللى باقى ينداس ..وِ يتْمَزَق
هارْجَعْ و أقُصّ غيرُه دا مافيش كلام فَرَق؟
في عالم من ورقْ!

و هاقصْقَص في الورق المُلْحق والديباجه
و اعْمِلْ بُو دبّابات طيارات وِ مَدافِع
يمكن فى يوم تِبات هِـديّه للخواجه
يمكن فى يوم تدافِع و ترُدْ اللى اتْسَرَق
أصلى ما املكش حاجه ما املكش الاّ الوَرَق!
و مقص بدون رنين مسنون شوق من سنين
بيموت من الحنين .. بيموت و بيتفلق

و مقَصّى دا دائي داق قص أوْراقي بتترصّ علَى الـمَلأ
بوسـني قُـدسي وعـراقي
بيمـوتوا والبـاقى في حـروفي بـيـتْـشَنَق
بيموت من روح ركود .. وبيغْلي م الجمود ..
بيموت علشان وجود
يعـود
و يتْـخَلَقْ

كلمات : محمد محمود مرسي