سد النهضه
ــــــــــــــــــــــــــــــــــــــــــــــــــ ــــــــــــــــــــــــــــ
ابي احمد يا بتاع أثيوبيا
ما تبطل تهديد ومناهده
خليت أيامنا بقت كوبيا
بعد حكاية سد النهضه
وبتنكر مواثيق دوليه
وبتنسى اتفاقيات متخده
الميه ف أنهار الدنيا
ربك هو اللي محددها
ومحدد للناس كميه
تكفيها هي واولادها
وتكفي الاجيال الجايه
بأحفادها وأحفاد أحفادها
الميه بتساوي حياتنا
زرعتنا بتموت من غيرها
وارثينها من عهد جدودنا
وهتفضل تركه لأولادنا
في وفاء النيل كنا بنفرح
علشان كان عيد من اعيادنا
ييجي بتاع اثيوبيا يجرّح
بكلام خايب ويهددنا
إحنا دفنا الشُهدا ف سينا
علشان حد طمع في حدودنا
وعشان حبة رمل وطينه
ييجي اليوم حد هيحرمنا
من مية نيل رمز وجودنا
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــ
مسعدالنحلة