ذنبي ايه
لاقيت نفسي من غير اهل
معرفتش اعيش ولا يوم سهل
معنديش اب يحمينى
ولا حضن ام يدفينى
سمونى ليه طفل شوارع
شوفت كتير وعشت مواجع
ذنبي ايه
معنديش بيت ياوينى
ولا قريب للامان يعدينى
حياتى بين الرصفان
وعمرى ماحسيت بامان
وبنام تحت الكبارى
والقطط والكلاب هما جيرانى
ذنبي ايه
ذنبي ايه ان اهلي رمونى
المفروض للبر يعدونى
لو كنت اتشقيت حبتين
يربونى مش يسبونى حزين
لقيت نفسي لوحدى غريق
لا ليا اهل ولا صديق
ذنبي ايه
بشوف الاطفال بيقولو يابابا
شايف العيال دول غلابه
ولما اشوفهم ينادو الام
بيترمى علي قلبي الف سهم
انا برضه ياجماعه انسان
لكن لا ليا ماوى ولا مكان
ذنبي ايه
انا كل همى النوم والاكل
نفسي احس ان ليا اهل
بيقولو السعاده ليها ناس
بس انا برضه ليا احساس
الحقونى وحسسونى بالامان
انقذونى عشان اكون انسان
اعمل ايه
لاقيت الكل بيتخلي عنى
وكل الخلق بيظلمنى
وبشرب من دمع عينى
نفسي فى بيت ياوينى
لحد امتى هعيش محروم
نفسي افرح ولو ليوم
تعملو ايه
انقذو اللى فيا من انسان
انا لا ليا اهل ولا مكان
حاسس ان الحزن موجود ليا
وعمر الدمع مافارق عنيا
انقذونى وخلو العالم مغرد
انقذونى فانا طفل مشرد
ذنبي ايه |
بقلم محمد السباعى
المفضلات