يا ديك يا رومي
يا ديك يا رومي
يا ديك يا رومي يا نافِش ع الديوك ريشك
فاكر بإن الديوك هتخاف لتهويشـــــــــــك
وتنِخ زي الفراخ لا تزوم ولا تحوشــــــك
تأمُر وتِنهي وتِغضب حتى لو غلطــــان
ــــــــــــــــــــــ
النفخه ديَّا يا صاحبي مِن هوا منفــــوخ
دايما تفرقع بإبره أو بشكة سيــــــــــخ
أو تبقى ريشه وطايره في الهوا وتدوخ
وان كنت تفضل ف حجمك تبقى ديك مليان
ــــــــــــــــــــــ
ليه التعالي وليه تبقى أبو العريـــــــــف
تِفرض زعامتك وطايح ف الديوك تخويف
ما هو كل ديك لو يكاكي برضه ديك .. معروف
لا هيبقى هُدهُد بتاج .. ولا حتى أبو قردان
ــــــــــــــــــــــــ
يعني التواضع يا صاحبي برضه شيئ مطلوب
أما التعالي يخللي الناس تقول معيــــــــوب
دا الصنف كله يا صاحبي زي بعض يا دوب
يعني الديوك كلها عاجزه عن الطيــران
ــــــــــــــــــــــــ
ليه تطلع انت وتعمل فيها طير كروان
لا انت بتعرف تغني ولا تفهم الألحـــان
يعني يا دوبك تكاكي أو تِشـِّد أدان
يبقي الديوك في الطبيعه كلهم إخـوان
**************
رد مع اقتباس
المشاركة الأصلية كتبت بواسطة الشربينى خطاب
المفضلات