فتاوَىَفضائيه
يوم ما الفضاء انفتح رقصِتله فرحِتنا
...................... وزعِلنا لما انسَعَر غول الكليبْ فيها
لـَكِنْ قناه للهُدىَ طِلعِت وأشجـِتنا
....................... شدِّت قلوب البِشر وودانها وعنيها
قنوات تزيد في العدد قلنا الخلاص فيها
..................... ودى فرصه زى الدهب لازم ننميها
أرواحنا راحِت لها شايله أمانيها
......................... قلنا خلاص البلد الدين قِوي فيها
ـــــــــــــــــــــــــــــ
قطر الفتاوي ابتدى فيها يتوِّهنا
.......... ساب القضيب وانحرف حاسِب يجيب داغك
عُلما كتير عندِنا لو رحت تسألها
........................ لازم تِقدم طلب واستنى إبلاغـَك
قنوات كتير بالوما سايبينها للفتوى
.................. يفتوا قوام ع الهوا ويلخبطوا دماغك
تِسألهم الأسئله تِلقىَ الجواب شاطِط
............... لو قـُلت لأ مش كده هيلطشـُّوا صداغك
ـــــــــــــــــــــــــــــ
في قناه يقولك غلط تاكل زلابيِّتكو
................ دي بدعه مُستحدثه فيها الحرام راجـِح
وقناه تقولك على الرشوه حلال بينكو
.................. وقناه في أمر الربا تِلقىَ الكلام جانِح
وقناه صدر حُكمها بإعدام سي ميكي ماوس
.............. مع أي شيء يشبهه أصل البعيد ناصِح
أما الفنون كلها ممنوع تداولها
......... علشان دى ليها العجَب فيها الفجور واضِح
ـــــــــــــــــــــــــــ
أهل الفتاوي هِنا موجوده بالزوفه
................. ليه تتركوا المسأله سايحه وممسوخه
ليه الفضا يتملي من غير ولا رابط
............. طل اللي دقنـُه طِول والصبغه مبخوخه
يطلع لِنا بفتوته ويعيد يزيد فيها
.............. زى اسطوانه بيك اب دايره ومشروخه
أصبحنا في لخبطه والأمر موش واضِح
............. ليه شتِتوا فِكرنا .. ليه بس دى الدوخه ؟
ـــــــــــــــــــــــــــ
أزهر عتيق عندنا حافِظ أصول ديننا
............... والإفتا دارها اتعمل فيه مكتبه ضخمه
يا ريت قناه تِتعِمِل مِنهم وتِتفاعِل
................... الناس حتلجأ لها وتفوق مِن اللخمه
وصحابنا دول يتمِنع فتواها بالفاصِل
................ منشوفش ناس مِنـُّهُم طلـَّه ومِتراخمَه
وياريت يكون همُّهم في الفِقه والسُنه
............... ودروس تِلاوه مع شرْح لكـُتب فخمَه
يختاروا ضيفهم عَلـَمْ مِترَّبي في الأزهر
................... ساعِتها نِسعد بهم حتى ولو زحمه
نِدعي نقول يا غـَني قنواتنا كتـَّرها
............. لو كانوا راح يعرضوا بالحَق والرحمه
******************
المفضلات