لو رحت مره مصلحه
لو رُحت مره مصلحه
لو رُحت مره مصلحه ........... علشان هتِعمِل مصلحه
تِلقى وجوه مِتكلـَّحَه .................. قاعده وآخر رحرحه
تِفضل يا دوب قبل الضـُحَىَ ....... بعديها تزويغ م العمل
ــــــــــــــــــــــــ
تِسأل عن الأستاذ فلان ........... اللي انت جتلـُه من زمان
كان مكتبُه ف نفس المكان ..... تِسأل عن الطلب اللي كان
قدِمته بترخـَّص مكان ............. ما تلاقي فيه شيء انعمل
ــــــــــــــــــــــــــ
يلقى الطلب صُدفه ف دولاب .. مردوم عليه اكوام تـُرَاب
ما تلاقي حتىَ حد جاب ........... حاجه وزال عنه الهباب
قاعدين يناقشوا بالعِتاب .... مواضيع بعيده عن العمل
ــــــــــــــــــــــــــــ
تِطلع على الأستاذ حسين ....... راجل بدقن وسِبحِتين
قاعِد مسبِّل في العينين ............. وكأنه هينام حبتين
وتتوه ما تِعرف رُحت فين .... ولا إمتى يبقى فيه أمل
ــــــــــــــــــــــــــــ
تِطلع على سيادة المُدير ...... تِلقى المكان زي الحرير
تدخل بيأس المستجير .......... يمنع دخولك واد غفير
تِرجع تِصِّر على المرور ... وتخش في وصلة شـَكـَل
ـــــــــــــــــــــــــــ
تِلقاك ف إيد أمن المكان .... إتنين تخان زي التيران
تاخد طريحه بالامتهان ....... ويعجزُّوك قبل الأوان
وتلاقي نفسك في اللومان ........ لِتـَعَدِّي أثناء العمل
ـــــــــــــــــــــــــ
وتكسَّر انت في الحطب .. رغم انك انت اللي انضرَب
وتلاقي بيتك ينخرَب ...... وكمان ما يخلصشي الطلب
ويقولوا إن انت السبب ....... أصل انت عَطـَلت العَمَل
***********
رد مع اقتباس
المشاركة الأصلية كتبت بواسطة د.محمد فتحي الحريري
المفضلات