ليه الموظف يرتِشِي
ليه الموظف يرتِشِي
ليه الموظف يرتِشِي ............... ويطالِب الناس بالفلوس
مش برضـُه لازم يختِشِي ... ويكون عزيز نفس وحَسِيس
ليه جيبُه دايمًا يتحِشِي ......... بفلوس في شرع الله حرام
ـــــــــــــــــــــــــــ
لو يرعى ربُه يرزقه ............... يدِّيلـُه من عنده الحلال
يحميه ما حدش يسرقه .................. ويجَنـِّبُه ذل السؤال
يعطيه ف خير ويغرَّقه ............. رغم المرتب مش تمام
ـــــــــــــــــــــــــــ
أما اللي ياخد رشوِّته ................ ربك هيفتح ألف باب
يلقى المُصيبه ف سِكـِّته ...... نازله عليه جايبه الخراب
واللي خدُه من سِرقِته ....... يحتاج عليه قول ييجي كام
ــــــــــــــــــــــــــــ
يبليه بإمراض في الجَسَد ............. يبدأ يزور مستشفيات
يدفع فلوس ملهاش عدد .... وكمان يومين يقولولوا هات
يفتِكروا أهلـُه انه انحَسَد ..... علشان ما هوش قادِر ينام
ــــــــــــــــــــــــــــ
ومراته تصرف بالهبل .. في حاجات كتير ملهاش لزوم
لو تِتسِرق أو تتنـَشـَل .......... تقعد له طول الليل تزوم
ولو ابتدَىَ معاها الشكـَل ....... تفضل تعيَّط والســــلام
ــــــــــــــــــــــــــــ
طب يجرى إيه لو تِهتِدِي ..... وتراعي ربك بالأصول
لا تِرتِشِي ولا تِعتِدِي ..... ولا تِختِلِس شيء م الأصول
شرَّف ولادك وابتِدي ......... صحِّي ضميرك م المنام
ــــــــــــــــــــــــــ
يا دوله فوقي وقدَّري .... دا الأجر أصبح شيء هزيل
ليه المُرَتب ينهِري ... خصومات ودمغه وشيء رزيل
يا دوله إصحي وقرري ......... رفع المُرتب كل عام
ــــــــــــــــــــــــــ
يعني الموظف يعمِل ايه ...... ياكل بإيه ويسكن بإيه
دي ديون بتِتـَلتِل عليه .... أصبح ما بيشوفش الجنيه
آخر المتمه هيعمِل ايه .... ملهاش حلول غير الصيام
***********
رد مع اقتباس
المشاركة الأصلية كتبت بواسطة أمير محمد محمود طه
المفضلات