الأحيــــــــــــاء


عذرًا يا رؤساء لاحيــــــــاء
نفس العِله ونفس الــــــــداء
الأحياء مليانه زبالـــــــــــه
وانتو ف حالة لاسترخــــاء
ــــــــــــــــــــ
الناس تبني بيوتها مخــالف
ومهنديسكم دايمًا عـــــارف
علشان قابض باكو بحـــاله
يبقىَ مطنـِّش وماهوش شايف
ـــــــــــــــــ
الميه أحوالهـــــــا غريبــــــه
إيصالتها مبالِغها كئيبـــــــــه
كل شهورنا بنفس الحـالــــه
وان أخـَّرنا الدفع مصيبـــه
ـــــــــــــــــ
إيصالات دايما ليه مخبوله
فيها مبالغ مش معقولـــــه
لو حتى المواسير مِنشاله
أو كام شهر بيوت مقفوله
ــــــــــــــــ
لو جيت مره تطلع رخصه
تِلقىَ مكاتِب عميا وخرسا
وان قدمت طلب بالحالــه
إبقى قابلني لو نال بصــه
ــــــــــــــــ
وان شخشخت ف مرّه جيوبك
يخدوا قوام منك مكتوبـــــك
ويسجلوا بيانات بالحالــــــه
يجهز حالا .. ثانيه يا دوبك
ـــــــــــــــــــ
ومطبات وف نص الشـارع
سايق وكأنك بتصــــــــارع
أفضل لك حوِّل خيالـــــــه
دا المكسور دايمًا مش راجع
ـــــــــــــــ
وادي مجاري بدون غـُطيان
طبعًا بالليل موش هتبــــــان
لو واحِد موش واخِد بالـُـــه
هيطـُب ولو مش عَمْيَّــــــان
ـــــــــــــــــــ
طب فين الأحياء يااخوانـا
هىَّ المسئول عن تأمينـَّــا
بتزيل البلا قبل وقوعــــه
واللي يا ناس هيسبب مُوتنا
ـــــــــــــــــ
ديَّا نماذج للأحيـــــــــــــــاء
بتموِّتنا ولو أحيــــــــــــــاء
مطالِبنا ف دولاب منشالـه
إلا لو كان فيه استثنــــــــاء

***********