الكتكوت الفصيح


إرجع وادخـُل في عِشـَّك ... يا كتكوتنا الفصيــــــــح
واوعك تنفـُخ في كِرشك ... لتنام ليلك جريـــــــــــح
هتلاقي الناس تِهِشـَّك ... بكلام ما هـــوش مُـــــريح
أو يضربوك في وشـَّك ... علشــان دايمــــــا تصيح
يا كتكوتنا الفصيح
ـــــــــــــــــــــــــ
ليه تِدِّعِي الفصـــاحه ... وتقــول كلام كبيـــــــــــر
وبمنتهـَىَ البجَــــــــاحــه ... عاوز كمـــان تِطِــــير
إدرس أبلا المِـــلاحـه ... دا الجـو فــوق خطيــــــر
والجاهِل بالنواحــــه ... إزاى يقدر ينــــــــــــــوح
يا كتكوتنا الفصيح
ـــــــــــــــــــــــــــ
دا النخله لما تِطــــرح ... تِتحَـدِّف بالزلــــــــــــط
وعيال تِجــري وتِفـْرَح ... لو البلح انفــــــــــــرط
وكلاب تِزْعَق وتِنـْبَح ... في الصح وفي الغلــــط
لا تِفـْهَم كلمه تِجْرَح ... ولا تِفهم في المـديـــــــح
يا كتكوتنا الفصيح
ــــــــــــــــــــــــــ
تِجْرحنا ليه ردودك ... وتلخبـَّـط في الكـــــــــلام
علشان تِثـْبـِت وجودك ... في القعْده والســــــلام
تـُقعُد نافِخ خـُدودك ... عاوز جوزين قِــــــــــلام
إعرف أول حــــدودَك ... خليك راجـِـــل مُــريح
يا كتكوتنا الفصيح
ــــــــــــــــــــــ
والرد الحِلو طيِّــب ... والكِلمــه ليـــها لـــــــون
والمعنىَ فيــها يـِطـْرب ... بـِيبــان جوَّه العُـيُون
تِلقــاه دايمًا قـُرَيِّــــب ... مليان حِسْ وشجُـــــون
ليه انتَ تِيجـِي تِقـْلِب ... لكلام ما هوش صحيح
يا كتكوتنا الفصيح
ــــــــــــــــــــــ
رُوُح اتعَلـِّم بلاغــــه ... روح اتعلــــــــم أدب
ليه تِعْمـِل بس غـَــاغـَه ... مِن غير ذرة سبب
وتعِيـِب ليه في الصياغـَه ... وكلام حلو انكتب
موزون في محل صاغه ... مهوُش كلام أبيح
يا كتكوتنا الفصيح
ـــــــــــــــــــــــ
قبل ما تِبْدأ كلامــك ... شوف أول انت فـــــين
ولحد فين عَــلامَك ... وشهــادتك جــــت منيـن
وعشان تِعـْرَف مقامَك ... إحْسِب فرق الســنين
لا تعُض إيد عِمَامَك ... ولا تِنـْبـِش في الجروح
يا كتكوتنا الفصيح

*************