الدنيا زحمـــــــه

الدنيا زحمـه ف حيِّنا واحْنـــا بنـُزنق نفـْسِـــــنا
وبيوت كتير فوق بعضها دا الخنقه دي بتضرِّنا
ومفيش هوا صابح نضيف نستنشقه في صدرنا
لو جه وباء فيروس خطير بسهوله يقدر ينتِشِر
وبسرعه وبكل اقتدار يقدر يقصَّف عُمْرنــــــــا
ـــــــــــــــــــ
وهناك وف بلاد العَجَم كل البيوت مِتنطــــــوَرَه
حواليها أرض مخضـَّره في حته واسعه مشجرَّه
مش للعياقه أو تعالِي أو غرور أو منظــــــــرَه
عارفين هناك معنى الحياه لما تكون وسط الهوا
مش زينا عايشين ف خنقه ونفـْسِنا متضــرَرَه
ـــــــــــــــــــ
دي بلدنا صحرا كلها والأرض واسعه مبحبحـه
لو كنا بنفكـَّر صحيح وعقولنا فايقه مصحصحه
نخرج ونبني هناك بعيد والعيشه تِبقى مرحرحه
نرحم وادينا اللي اتخنق والأوكسوجين اللي انحرق
فيه ناس كتير عارفه ولاكن لسه برضو متنـَّحَه

************