الـمـديـنـه الـمـفـرحـه
المدينه المفرحه
هى دى عيشة المدينه المفرحه
أطفال شوارع متشردين
ولاد وبنات مترمين
فى الطرق وف الأشارات
وتحت الكبارى المرعبه
هى دى عيشة المدينه المفرحه
تلاميذ مدارس بينطو السور
ويلعنو خاش المدرس
ويعاكسو المدرسه
هى دى عيشة المدينه المفرحه
شارع أصبح عـَـلــم
بيسموه شارع الهرم
شارع ملئ بالكبريهات
والرقصات العاريات
شغلتها تعرض لحمها طول المسا
هى دى عيشة المدينه المفرحه
ناس بتلهث فى الشوارع
اللى رايح زى اللى راجع
ناس همها تحصل عشاها
ناس بتهرب من حياتها المنكسه
هى دى عيشة المدينه المفرحه
وناس غلابه بيوتهم من صفيح
وناس غلابه ساكنين العشش
عشش من فوقيها ديوك بتصيح
تحيا الحياة المفلسه
هى دى عيشة المدينه المفرحه
واعلانات ممثلين ومطربين
بشئ الفلانى
وناس بتحلم من يومين
بطبخه نسيتها الأوانى
بكلمه نسيتها الأغانى
ناس بتحلم وهيا صاحيه
بكيلو لحمه
بعد ما أصبح أمانى
ناس كرهت عيشتها المفرسه
هى دى عيشة المدينه المفرحه
ناس بتسهر للصباح
من كتر الملل
وناس دفنت شبابها فى العمل
وشاب قضى كل عمره ع القهاوى
مستنى كلمة عطف من الحكومه
مستنى يقلولوا يلا تعالى اشتغل
يلا يابن المكنسه
هى دى عيشة المدينه المفرحه
وناس تانيه ماتعرفش بعض
ولا بيمدو ايديهم لبعض
إلا عشان المصلحه
هى دى عيشة المدينه المفرحه
فى الزحمه بنصادف وجوه متلونه
وضحكه صفراااااااااااا مُظـلـمـه
وقلوب ميته وللأسف منتنه
هى دى عيشة المدينه المفرحه
فى ناس تقول الزحمه ونس
وناس تقول الأختصاره عباده
بصيت بعينى ع الزحمه لقتها عبس
وناس بتاكل فى بعضها بزياده
وانا من يوم ماجانى اليوم
اللى صوتى فيه انحبس
وانطلق هاويس الدمع من عينى
يروى زهور صبار
نابته فى خدودى
يخرص لسان الحق جوايا
ويتعدى على حدودى
قلت إلا الحق
كله إلا ده
وندهت وقلت يااخوانى
الزحمه مستحيل تكون ونس
الزحمه ناس بتطحن فى عضم بعض
فى الزحمه ناس بتموت
ومبيسألش عنهم حـد
والمدينه لفيها صبر ولاهواده
يا اخوانى فى حكمه مابنا معتاده
أجدادنا من قبلنا قالوا
فى الاختصاره عباده
كـلـمات
على عبدالحميد المسرت
ali_abdelhamed@hotmail.com
رد مع اقتباس
المفضلات