باب البوابة بابيـن

[فخري فزع]

باب البوابة ببابين = بكبسة وشالات وقلاب
عل البوابة في بنتين = بعينيـّن وكف وجلباب
***=
بدي غني يا اصحاب = بجرأة وتسمعوني زين
خالد اهدى لزرياب = المهرة وركـبِ إغراب البين
هيفا تغني ومش بتهاب = بوس الواوا وبابا فين
بابا نايم حد الباب= ميكل كبدة بريالين
ولحمة وتفاح وعـِناب = المنتج معطيه شوالين
وقصر وبستان واعـْناب = وشقرة وبحرسها كلبين
وبيصلي وبقرا الكتاب = وللشيخ بيعطي قرشين
وللأقصى كفو وهاب = ودمعو سايل عالخدين
أنا بدي غني عالبابين =
عالحِملان وعالجَلاب =
باب البوابة ببابين = بكبسة وشالات وقلاب
عل البوابة في بنتيـّن = بعينيـّن وكف وجلباب
إنْ فـَتـْحـَتْ بتلاقي تلـّيـّن = وسهل وخالي من الاعشاب
قطن تلا قي ؟ ! قل لي ويّن ؟= مرمر شب بدون تراب !
داسو قواد بنعليّن = ودلق نبيذو وغز حراب
بنت غراب وجلابيـّن = وجلاب وبنتيـّن غراب
وبنت غرابيـّن وجلاب=
ية =

[محرز شلبي]

الله يبارك فيكم ويكون في عونكم سيدي الفاضل ..تحيتي واحترامي

[فخري فزع]

وفي عونكم اخي الفاضل محرز شلبي
شكرا على مرورك
تحيتي واحترامي

[فخري فزع]

باب البوابة ببابين = وقوسيّن وسور وتمثال
عل البوابة في نمرين = وفانوسين ورسم هلال
*** =
مشيتي يام خدود وخال = وسبتي القرية والنبعين
كنت بين رجال رجال = كنت وين وصرت وين
قـِرّطـَل وجرة وشلال = حقـلة وتلّ وكرم وتين
بميلة خصرك جدول مال = ومالت شتلات الياسمين
صرت بضاعة للدلال = بملهى في خمسة وعشرين
اغلى منك خمسة ؟! قلال = وأرخص منك في عشرين !!
أجرب لو يطلب بالحال = ومثله أعور بتلبين
ربك سيدك شرعك مال = ومصاص الدم بنابين
بدي غني عالبابين =
باب العزة وباب انذال =
باب العزة عليه قفلين = وباب الذل بلا اقفال
باب البوابة ببابين = وقوسين وسور وتمثال
عالبوابة في نمرين = وفانوسين ورسم هلال
كل شباب الوطن إثنين = ال عندك يحيى بدون غلال
وصابر مغلول الزندين = حرس حدود وكوم عيال
النصر بيجي ؟ قولي منين ! = ومين مربي للأطفال ؟!
نذل و قيد وتمثالين = وتمثال وقيدين انذال
ونذلين وقيد وتمثال =
يـة =

[فخري فزع]

باب البوابة ببابين = الضفة وغزة الابية
بسكرة ومفاتيح اثنين = والأقفال الدولية
***=
انا بدي ابعث تحية = للي مساند فلسطين
قادوا سفينة حرية = إخوتنا الانسانيين
الْ قدم دمو ضحية = لأهلي وناسي الغزيين
إلهم روحي وعيني = هالشهداء التركيين
وكل من شارك بالجية = بفديـــــه بدم الشاريين
يا جيوشي اليعربية = ويا حكام ويا سـْلاطين
وين الهمة العاليّه = ومن فيكم صلاح الدين ؟
يلي بعتوا القضية = ويلي بثوب الثورين
انا بدي اصرخ عالبابين =
بالكي بتصفى هالنية =
وحدتنا مش مجتمعين = ع بواب سلام ٍ مهريّة
وحدتنا نصون ِ قـْوانين = ولا نرضخ للتبعيّة
نعارض بعض بلا سكين = حتى نصون القضية
الطوبة نبنيها بكفيين = ونرفع باب العليّة
كلمة وحدي ومش ثنتين= برة البلد وقويّة
نحط الرمح بعين الشين = ونقطع راسك يا الحيّة
خمس بواب على سجنين = الضفة وغزة الأبيّة
اربع حراس بعباتين = وخامس حارس للميّة
حية وحرية وقفلين = وقفل الحرية بحيّة
وبحية اقفال الحرية !=
يــة =

[باسل محمد البزراوي]

أخي فخري فزع
تحياتي
روعة وروعة وروعة
أشكرك من قلبي على باب البوابة
واهتمامك بالشعر الشعبي
لك مني رسالة خاصة
أرجو الاطلاع عليها.

[فخري فزع]

شاعرنا وزجالنا الحبيب باسل البزراوي
سعادتي كبيرة بروعة مرورك وذوقك الرفيع
انت قاريء وخبير في الزجل وتعرف معانيه جيدا ولك فيه دراسات
وشاركت كزجال في حفلات العرس الفلسطيني ... انت قامة عالية وسامية في ربوع البلاد

احزنني البعض لعدم سعة ادراكهم وخبرتهم فشعرت لبرهة
ان مجهودي يضيع سُدى

وها انت اليوم تمدني بالتشجيع والطاقة
لأعلم ان الشعر والزجل ما زال بخير
سعادتي كبيرة بشهادتك ومرورك النبيل الطاهر

لقد قرأت الرسالة وارسلت ردي
اتمنى لك مزيدا من التقدم والازدهار
ونفعنا الله بعلمك وادبك سيدي
محبتي وتقديري

[فخري فزع]

باب البوابة ببابين = بدفة ومقدار ومقياس
ع البوابة محمدين = بهمز ولمز بدون إحساس
***=
ناوي وَجِعْ لـَكْ هالراس = أبو حطة صفرة وعقالين
بتنفع زينة بالاعراس = مزركش جاك غراب البين
اللحية بيضة الوجه نحاس = إلينا بتلعب ع الحبلين ؟
يا مختار إرحم هالناس = وبيكفي إمْجَوَز ثنتين
الفرشه حرير وذهب الكاس = وقصرك قايم ع دونمين
للبنت بتغنج كـَيّاس = وصافي حُبك وبلونين
وللشاب بترفع مِسّـْاس = وبتردو وحمرة هالعين
بتشهد زور على كـَنّاسْ = ولخصمو معروفك دين
أنا بدي غني عالبابين =
ع الكناس وع الجلاس =
هذه الدنيا قرضة ودين = وع سريرك علقت جراس
إنْ رنت قال محمدين = ناقة وفي حِمى جساس !
وحولك من كل عـَيـّلة إثنين = وقصرك ما يمكن ينداس
غير بغدوة ودينارين = لأبن العيلة هالشماس
وزندو يحطو ع الكتفين = يقول إدهن ع بن الانجاس
ناس تجامل هالكلبين = بختمين بيمضي القرطاس !
بأس وختم وشماسين = وشماس وختمين وباس
وبأسين وختم وشماس =
يــــــــــــــــ ـــــــــــــــــــــــ =
يـــــــــــــــــ ـــــــــــــــــــــ =
يـــــــــــه =

[د.محمد فتحي الحريري]

باب البوابة ببابين = بدفة ومقدار ومقياس
ع البوابة محمدين = بهمز ولمز بدون إحساس
***=
ناوي وَجِعْ لـَكْ هالراس = أبو حطة صفرة وعقالين
بتنفع زينة بالاعراس = مزركش جاك غراب البين
اللحية بيضة الوجه نحاس = إلينا بتلعب ع الحبلين ؟
يا مختار إرحم هالناس = وبيكفيك إمْجَوَز ثنتين
الفرشه حرير وذهب الكاس = وقصرك قايم ع دونمين
للبنت بتغنج كـَيّاس = وصافي حُبك وبلونين
وللشاب بترفع مِسّـْاس = وبتردو وحمرة هالعين
بتشهد زور على كـَنّاسْ = ولخصمو معروفك دين
أنا بدي غني عالبابين =
ع الكناس وع الجلاس =
=

اخي الكريم الشاعر العروضي والشعبي
أدهشتني بنصك الجميل رغم اني كما لا يخفى من انصار العمودي الفصيح
الا ان الشعر الشعبي له وجوده ومكانته ان كتب بصيغة راقية
وكنت الارقى مولاي
شكري وتجلتي .

[فخري فزع]

اخي الكريم الشاعر العروضي والشعبي
أدهشتني بنصك الجميل رغم اني كما لا يخفى من انصار العمودي الفصيح
الا ان الشعر الشعبي له وجوده ومكانته ان كتب بصيغة راقية
وكنت الاقى مولاي
شكري وتجلتي .

شكري وتجلتي مولانا الشيخ محمد فتحي الحريري
يكمن نجاح الشعر الشعبي في مدى ملامسته للواقع
ودخوله الى ادق تفاصيل حياة الناس المعاشه
فهو لا يزينه كما هو حال الشعر العمودي
في الزجل يحاور الزجال الحماة والكنة
والسيف والقلم
والسمرا والبيضة
ومختار البلد والحاكم
والوضع الاجتماعي والسياسي
بلغة دارجة وكثير من الامثال والحكم
وهنا يظهر الرقي
كثير من رواد الشعر العمودي ينتقدون الشاعر الذي
يعكر صفوهم بتبيان فساد مجتمعهم فهم لا يحبون الحديث عن ذلك
وحالهم كحال من يرمم الجرح على فساد
عكس الشعر الشعبي الذي يتناول تلك المفاسد ويعريها حتى يوقف اصحابها عند حدهم
فتقل المفاسد ....
وعليه فالشاعر الشعبي لا يخترع الحكايات لانها موجودة فمثلا عندما تكابر الدول بصلاحها وطهارتها
وبيوت الدعارة تملأها ... ألا يجب على من يكابر ان يعمل شيئاً ضدها ...
ألا يجب على العلماء والفقهاء وأئمة المساجد محاربة ذلك ؟ ومحاربة كل مختار فاسد ؟
أليست محاربتها وقول كلمة الحق تجاهها هي من اعلى مراتب الجهاد والصلاح لكل من يدعي الصلاح

الحبيب الشاعر
لا عليك
وددت لو استطيع ان اغير مداخلتي هذه ليرضى عني الجمهور
ولكن اصراري على الوقوف في وجه الزيف يمنعني
سأبقى وحيدا ويتيماً لآخر المشوار

شكرا على مرورك القيم الذي يسعدني
ولك المجد والمحبة

[فخري فزع]

مخمس مردود

الدنيا بتحلا بوجـودك = وبتفتّح عنّـا الازهـار
صاير قلبـي بـردودك = عم يغلي وعم يشعل نار
****=

سهام عيونك أخذ و رَد= القد عراقي وعنق الشام
شام العنق عراقي القـد = و رَد وأخذ عيون سهام
بزنارين ونهـد وخـد = ورْد شفافك جاب الكـام
الكام الجاب شفافك ورْد = ونهدين وزنـار وخـد
وخدين ونهـد وزنـار =

[فخري فزع]

حروفي وبتروي العطشان =وشِعري من الغيدق اعذب
سيبك من حرف الحيران = بـِحِقـْدو وجمرو بتقلب
فخري رابي ع الغدران = من صافي المية بشرب
وع التلة عندو خزان = و" قانا"و"المطوي" نبعين
باب البوابة ببابين =
وزيتونه رِبْيَتْ ع البير=
الحُر بيصعد سِلـَّمين = ويجمع مملوح وجرجير
زيري وبيري والنبعين = يا عطشان إشرب تعبير
تعبير إشرب يا عطشان= ونبعيني وبيري والزير
وزيريني ونبعي والبير=
يــــــــــــــــــــــــــة =

[فخري فزع]

بلمحة من الفكر الوهّاج = بذكر عُبادة ابن الصامت
إشارة وشمعة للخدّاج = بحرفي الصامت والصائت
عُبادة صخرة من المعّراج = وصوته جَهور ومش خافت
بشفرة للخمرة بعـّاج = تراب بثم الكاذبين
باب البوابة ببابين =
لَ قصر الخضرا بدون سياج =
ع البوابة في عبدين = وهرة عطشانة وِسْراج
رويت خوف من النعلين = وصارت تفهم بالابراج !
صاج وخبز وكرباجين = برمزين قناع الحلاج
الحلاج قناعو برمزين = وكرباجين وخبز وصاج
وصاجين وخبز وكرباج =
يــــــــــة =

[فخري فزع]

حُط نـُقاطك عا لِحروف = وفي حبك مَتـْعَـيّـرنيش
فـِكري من الجنه مقطوف= افكارك ما بتلزمنيش
بيني وبينك حُط صفوف = تيجينيش وباجيكيش
وقضي هالعمر ملهوف = تا تسمع مني حرفين
باب البوابة ببابين =
وزهري مرتب خمس صفوف =
ع البوابة في اسمين = الساجد والجالس ع الروف
مهما تشاور بالكفين = بوس ترابي وما بشوف
روف ومشغوف بخدين=العين ان شافت وجهو تعوف
تعوف ان شافت وجهو العين = خد ومشغوفين وروف
وروفين وخد ومشغوف=
يـــــــــــة =

[فخري فزع]

بـِسَـنام ومن ساق الحنطة = سلال بَديتي و بالألوان
وبايدك احلى شنطة = قِرّطلّ بلون الغزلان
يـَما ما احلى القمطة = على ثوبك وبزهر الرمان
بعدك مزيونة ونشطة = وعمرك بيزل السبعين
باب البوابة ببابين =
وبيرين وعتبة وبسطة =
ع البوابة تمثالين = بخشب , بإحكام الخطة
سيدي زرعهم ع الجنبين = ولبسهم بيدو حطة
ربطة وخطة وقماطين = وسيفين وبدلة شرطة
بدلة شرطة مع سيفين = قماط وحطات وربطة
وربطات وحطة وقمطة =
يــــــــة =

[فخري فزع]

بيوخذ من جيبي فكة = وبيخرج يلعب جلول
عيّنو بتأكد شكي = لما عيني فيها تجول
بيخسر وبيرجع يشكي =صاحب شركة سهامو نزول !
على قلبي يا طفلي ضحكة = وانت وبختك خسرانين
باب البوابة ببابيّن =
وقالوا من العصر التركي =
ع البوابة اُستاذيّن = وفي الشتا المية بركة
دبكة وضحكة وطباليّن = بشباكين الكل بيحكي
الكل بيحكي بشباكين = وطبالين وضحكة ودبكة
ودبكات وطبلة وضحكة =
يـــــــة =