أشواق الزمن الضائــع - نص جديد في شان الوحدة السودانية -

[محمد إسماعيل الرفاعي]

أيــا أسمــر..
إذا الصوت البِفِج جـوفك
ويقاسمك في حزن خوفك
سرح في يوم بعيد عنّك
وخيّب بالجحود ظنّك
ولا قال ليك كيفنّك
وقام بشويش جفل منّك
بدون تشعر .. في رمشة عين
مرق منّك صِبِح صوتين
فهـل ممكن في داك الحين
تقول لي دحين
منو البفهم مُرام قولــك ؟
وإيه راح يبقى مدلولك
وإيش حايفـهــم السامعين
ويــا أسمــر..
إذا القلب البضخ دمّك
وبي خيراتو كم عمّك
ويوت تــاكِل عليهو همّك
بعد ماكان حنين وامين
تنكّر أضحي جافي ضنين
قسى اتناسى ولا قدّر حُسُن ظنّك
بدون إذنك غَصِب عنّك
صِــبـِــح قلبين
لا إهتم بي شورتك
ولا وراك تقبّل وين!
وكريات دمّك احتــارت
تَلِف بي وين .. تفوت بي وين ؟
ولي وين تـاني راح توصل بعيد عنّك؟
واحدات راحو لفّوا شمال
وواحدات حودوها يمين
وإنتــا بقيـت تـدوش وتدوش
يلف راسك! بدون طوعك
بتَحَتِل في الوحل والطين!
يهيج بركان يجوط جوفك .. تزيد خوفاً علي خوفك
ويظهر ليك طشاش في العين
وتتمطوح شمال ويمين وما تقدر تقول لاكين!
حليلك صِرتا مخطـوفك .. وكت غشاك طشاش شوفك
تميد الأرض قدامك.. وتغطس فيها أقدامك
تراوح بين وحيح وأنين
وعاد لا وين؟
ويا أسمر ..
تصوّر لو صحيت في يــوم
لقيت وشّك .. نكـر هشّك .. طرد بشّك
عبس لي نفسو صرّا العين
وقال مابتبع الكرعين
ودون إذنك صِبِح وشّين !
وحار بيك الدليل في الحين
وماك عارف تقبِّل وين ؟
تقول لي مين؟فقولي دحين
في داك الحين
منو البعرف أصول فصلك
منو البيقول دهـ ما أصلك
منو البيهاتي لي وصلك !
وكت يلقاك بقيت إتنين
أيـا أسمر ..
دحين انحت بنات فكرك..
متين كان الشتات حِكرك ؟
حُكّ الراس وإتذكّر ..
وكت فاضت مياه تــانــا ومن فكتوريا جالك سيـل
وجوك دافرين من الجيهتين
ده أزرق مويتو هدّاره .. وداكا قليبو صِح أبيض
ودايماً في الطباع مسكين
منو اللملم شتات فيضن
منو الجمّع رذاذ غيضن
ووحّد بينهم الإتنين
وصار مجرى المياه واحد
بعد ما كانو منفصلين
وليدك قام علي محراتو بي همّه
وجاب واسوقو ما احتارغرس تيراب حنينو الزين
قرع مويتو وفرح نطط وكت وهّط خطاوي العز
خضارو الزاهي في الشطين !
فكيف تشتطّ يا أسمر وتتبع زمرة الطاشين
تغوص جوّه الوحل والطين
يقولوا ودار تـقول آميين
تقوم في لحظه تتفرتق
وإنتا الوحّد النيلين
لا .. ما .. ممكن
ولا معقول تقوم في لحظة
تتفرتق

الجمعة 8 / 10 /2010م