مصر الحزينة
في أحداث الإسكندرية المحزنة

يا عيون مصر الحزينه
ارمي حزنك كله فينا
كفّني بصبرِك شهيدِك
وامسحي دمع المدينه
***
يا عيون مصر الحزينه
***
احضني محمد وعيسى
واقتلي الفتنة الخسيسه
جُوّا جامع أو كنيسه
ربنا شاهد علينا...
***
يا عيون مصر الحزينه
***
قولي للدنيا الغبيَّه
مصر واحدة وإيد عَفِيَّه
م الصعيد.... لاسكندريه
كلنا ف نفس السفينه
***
يا عيون مصر الحزينه
***
اللي خانِك واللي خانّا
مش حسين ولا هوا حنّا
اللي خان... مش من وطنّا
عمرُه ما يكون حدّ فينا
***
يا عيون مصر الحزينه
***
اصرخي بحرقة... وصيحي:
اللي مات... ابني ودَبيحي
تفرق ايه... مسلم... مسيحي؟
دمّ أحمد.... دمّ مينا
***
يا عيون مصر الحزينه
***
الصليب فارد إيديه
والهلال مَحني عليه
حضن وِحدة... ما تلاقيه
غير في مصر العايشة فينا
***
يا عيون مصر الحزينه
***
...................
............
شعر
مصطفى الجزار
3-1-2011