يا مصر أنا بعشقك
دا أنا ابنك المحروق ,
تستني فيا الأمل
ب استنا فيك الشوق ,
أديني فرصة عمل
وشوفيني لما أفوق .

خطفني الصوت..
وآنا .. ع ال نت ب أتحايل
حروف الشات محصورة ..
سايبة.. كما سلسلة ..
عمالي تتمايل ,
أهرب مع الصورة ..!
يحمل لي صهد الكلام . .
فارس وأسطورة ,

شوقي إليك يا ولد
يا منوّر الـ فيس بوك ,
ومعلمي ..
للثورة لمّا تثور ,
جرعتني صبرك ..
وقتلت فيّا الشك ,
يكفيني أني أتبعك
يا تلج ف التنور ,



وحلمت لك إنك
من بين شتات المنام
ب تلم أوجاعك ,
ولا شفنكاش منك
رافض لمن باعك ,
قافل عليك التيه
شارخ كما سكين ب تستثنيه ..!
ناصع كما تلج . .
البياضي . . فيه ,
و ب تستعير الجمال م الشمس
رمز ..
استعارة ..
همس ,
الصورة . . والتشبيه ..!


يا آخر الملتقى ..
فيه للحديث باقي ,
أبدر عيون اللقا . .
أدخلني وتوّسع ,
لم الخيوط ف أيديك ,
إن ضاعت الأوردة ..
ف القلب ح تلاقي
شوق وحنين ومدى
وأنهار ب تجري إليك ,
فتش بلمسة فراشة ..
ادهس بركبة فيل ,
ارسم لي دنيا البشاشة
بالصدق والتأويل ,
سجّل حروف النِدا
تلقاني مستنيك .

أيدي في أيدك زيي أيد النيل
ما سلمت ع البحر بحرارة ,
كفي كما مركبة
متحمّلة مواويل
وحكاوي ب تصابح ..
الأم تبدر ولادها ..
يسجّلوا ملايين
الكل يتصافح ,
ميدانك التحرير ..
وميداني أنا الفالح ,

يا مصر يا للي القدر
خبط على بابك
قال لك أنا منتظر
ب الجد أحبابك ,
لو تشعليهم بارود
يتردّ لك حيلك
وال بُس من جمعهم
يعمل لك حسابك

البُس وعصابته ..
والسيدة حرمه ..
ومعاهم الروشنة
المحروسين لتنين ,
لو حد ح يعدهم
يمكن يا دوب .. ومفيش !!
يا مصر يا تورتة ..
متقسّمة ..
تلتين ..
للبُس وعياله ,
والتلت للألاديش ..!

محبوس أنا ف البيت
والبنت .. ب تعيّط
يا هوووه ..
مانيش غلطان
مش ذنبنا .. اغلط
طب بس أيه تهمتي ..؟!
شرفنا يا .. نابهة ..
مش لسّه بتقول شعر
عن مصر .. وأحبابها !
ح أنعلمك أزاي ..
بالشعر .. تظبّط

وجاركوا عبد الله
أزاي معاه ولدين
ح انحط له عله
ونسيب له بس حسين
والحجّة إن حسن
ف البحر .. ب يبحلق
وكماني ..
من كم يوم ..
البيه ..
نسي يحلق ..!
نحلق لهم أحنا
وندوّخوا .. سنتين

وإيه و إيه و إيه
مصر يا رويانة
بالظلم والتنكيل
ف الخلق آه .. يانا
وقلبك الأخضر ..
ما قدرش يتحمل
انه يعيش ع الشات
يسرح ويتأمل
فكانت الأنات
ف القلب سريانه

وتسر سبت ثورتك
يا مصر ف ثواني
دقة قليبي ف رفح
سمعتها أسواني
قلب الميدان .. أتنفض
يا مصر مين قدك
لما الهلال احتضن
عيسى .. ف يوم سعدك ,
وتوحدت عصبتك
ب الثورة من تاني ..!

وبلمحك يا سعد ..
ف وشوش الشباب..
ع الشات ..
وبسمعك يا سعد ..
ف قلوب البنات كالهمسْ ,
ب استني لمحة أمل
في رزمة اسكتشات ..
من عمرنا الضايع !!
بكره مرارة ليه ..؟!
دا أنا حلقي مش سايع
خدني إلى حضنك ..
ارميني جوّه الأمس
لسايّا ب احلم بيه !!