شعلة نشاط

شعر د. جمال مرسي

" مهداة بكل الحب لأخي و أستاذي غالب ياسين "


شعلة نشاط .. الله عليك
يا رب بارك لي ف. عنيك
غالب على غلب الزمان
ياسين بهيه بتناديك
بصيت لصورتك
شوفت قلب كبير قوي
جواه مداين
ترتوي
من نهر حبك ، من ايديك
و شوُفت أبويا
شُوفت أخويا
شوفت جندي في الميدان
شايل سلاحه ضد طغيان الزمان
و شوفت واتا
طير يغني فوق غصونك
صبح عيد .
شيئ أكيد
أصل القلوب تخضرّْ للناس الحبايب
و اما تشتد الكروب
بتكون حديد
شامخ بتكتب كلمتك
و لا تنسى عمرك أمتك
معرفش ليه القلب حبك
و انفتح لك من زمان
جايز عشان
شوفت في عنيك شط الأمان
أو شوفت فيك نيل مصر يجري
و الهرم
و القدس ساكنه في الضلوع
ما بتنهزم
رغم الصهاينة الأمريكان
رغم الجراح و النزف في عراقنا الحبيب
شوفت الأمل
مزروع في عينك يا بطل
بيقول شموس الحق مش ممكن تغيب
طبعا شموس الحق مش ممكن تغيب
ما دام بناخد حقنا بإيدنا اليمين
و ما دام معانا ربنا
و القلب ساكنه عمنا غالب ياسين