[



الوطن
الاوراق مشتة في الطريق
الهدرة بالكيلو طايحة
من قفة داك الرفيق
اللي الأحلام من فمو سايحة
او الهدرة المسكدة منو فايحة
كلشي كيشرح الوطنية
كلشي كيفهم بلا مفهومية
صبحت الأحاسيس داخلة التقسيط
بلا تعقيد م كاين غير التبسيط
كلشي كيتغزل في هاذ الكنس القصيف
كلهم في الدلالة شتا او صيف
كثرو الصمصارة او كثر التزقليف
الأسواق كبيرة او الناعورة هبيلة
كروشهم كبرات،قلوبهم ظلمات
يتزايدو على حقي او حقك
على همي او همك
على جرحي او جرحك
على الفقسة اللي فينا دارت خبلة
على الهدرة اللي كيبيعوها بالجملة
يكولو بيضة او هي كحلة
كلهم كيدلـــــــــو في الأحلا
كلهم يتزايدوا في ثمن الأوهام
حقوقنا ولات امتيازمع هاذ الزعامة
أحسن لي او ليك نديرو سياسة النعامة
حقوقنا م بقات لا نحاس لا فضة
غير قصدير يصدي
مع طول الحفير
أحل عينيك انت داير بحال الهامة
********
ما لهم مع الوطن
واش الوطن كيتشرى
و اش الوطن كيتلقى
واش الوطن كيتعطى
الوطن تــــــاريخ...
****
شكون اللي ساكن ا لآخر
واش حنا ساكنين الوطن
او لا الوطن ساكن فينا
الوطن كبير او في قلوبنا
ساكن او مدفينا ،امهنينا
من القر او الحر
من هاذ الشر
من هاذ الجرح اللي كيدبر
من هاذ النيران الكادية فينا
*********
الوطن حلم الكبير او الصغير
الوطن كان منامة د جدودنا
الوطن منامة يفكوها الفهامة
او كيفاش نفكو هاذ المنامة
***********
واش الوطن هو الأرض
واش الوطن نمرة في البطاقة
او لا خروف يتسابقو عليه الشناقة
واش هو الهوا الي في ريتنا يجول
واش هو الما الي في الجوف يصول
واش هو التربة الي عشقناها
أو لا الأناشيد اللي حفظناها:
بلادي بلادي
لك حبي و فؤادي
بلادي يا أرض الجدود ،
إليك لا بد نعود....
**********
الوطن ميتباع لا بالكيلو لا بالرابعة
الوطن م غ ر او ب، حروف متابعة
الوطن دم كيجري في عروقي
او عروقك او عروقهم
الوطن لون أخضر
في قلبي او قلبك او قلوبهم
الوطن لون أحمر من
دم الأجداد
الوطن حلم ولدي أو ولدك
الوطن نور ولدي او ولدك
و الناعورة طالعة نازلة كتدك
أحلام الصبايا و الشيوخ
ها العار بعدو هدرتكم لا ندوخ....
*******
الوطن حليب رضعناه صغار
الوطن هو البلاد و الاوتاد
راه في دمي او دمك
او دم الأجداد..
عيقوا ألخوت الوطن راه فهامة
مشي هدرة ،مشي شفرة
و لا جوع ولا قهرة.
الوطن راه حقي أو حقك
ما نخليوش فيه القرودة
يلعبوا حجاية علي بابا
و رباعة الشفارة
المعنى را عليكم فهموها من دابة..