لمحت بياع لمون عـــــــــلى كتفه ربع شوال
عمـــــــــال ينادى عليه .... ويــــغنى بالموال
ناديت عليه .. قلت له : بكام اللمون يا خال؟
قال : اللمون عندنا الواحـــــــــدة بقت بريال
أنا قلت : يعنى اللمون صار أغلى م التفاح؟
قاللى : وانا مالى؟ ماتروح تسأل الــــــفلاح
سألت عنه ..... لقيته فى البلد مرتــــــــــــاح
سهران مع الدش لمـــــا الفجـــر هــل ولاح
ترك صلاة الجمــــــــــــاعة والتزم فرِشــــه
ونام لغاية الضحــــى ..!! وصحى ملا كرشه
ملك..! ومالك زمام أمره على عرشـــــــــه
وطظ فى الأرض والزرع اللى مات عرشــه
حتى الجماعة اللى كانو يصحو م النجمـــــه
يولعو الفرن ... ياكلو ....... يغسلو الهدمــه
يربو فرخة وبطة ............ يوفرو اللحمـــه
بقو خلاص فولكلور ...... تاهو مع الزحمه
وليد وهيثم ...... ولاد الحاج فتح البـــــــــاب
باعو قراطين والجاموسة وحمارين ودولاب
وجابو دش وريسيفر ....... والمزاج عنـــاب
وسابو خضرة وبهانة ..! عشان سها ورباب
وأرضنا الطيــــــــــــــــــبة كانت كنوز وتراب
وزرعة خضرا ....... بيرعاها شيوخ وشباب
صبح ترابها قماين .... والعة نار وهبــــــاب
عشان ما تعلى العماير والنهاية خراب..!!!!!
المفضلات