جثث بتدفن الأحياء(عن مأساة غزة)
ليه ياريّس..
سِبْت (ليفنى) تعرّضك للشبهة ليه فى الاتفاق ؟
ليه قبلت ان الحبايب يبقوا كالأعداء وليه ..
ليه ماقلتش (لأ) فى وشّ (الستّ) لمّـا استحلفت لـ (رجال) وطننا ؟
ليه قبلت تكون إشارة خضرا لمرور الرصاص ؟
لو صحيح انك كرهت رجال وطننا ..
برضه مايصحّش (عدوك) يبقى ليه حق القصاص
ألف مرة الشعب يصرخ : يازعيييييييم افتح لنا معبر رفح
وانت ترفض
إفتح لنا معبر حياة
وانت ترفض
وامّا حصّل دمهم بوابة المعبر فتحته..
لجل يبقالك شرف حرصك على حضور الجنازة
بس قوللى ازاى تحطّ الطلقة فى سلاح الطغاة..
وامّا تتصاب الضحية تجيب لها الإسعاف وتبكى ؟
والحكاية مش صاروخ فرقع كـ (بمبة) ف إسرائيل
مش خلاف بين فتحاوية وحمساوية
كل دى - واسمحلى اقول - تفسيرات ساذجة وغبية
المؤامرة هى زرع فتيل خلاف
واختلافنا فى اتفاق واتفاقنا ف اختلاف
وبصراحة مش هاخاف اصرخ فى وشـّك م الفزع
واسألك : إيه رد فعل القمة غير شجب وإدانة؟
ترساناتنا اتكدّست شجب وادانة
مابقناش بنعمّر المدفع بـ دانة
إنما بنعمّره بطلقة إدانة
طياراتنا الوقت مابترميش على دماغ اللى بيحاربونا دانة
إنما استنكار ملغـّم بالإدانة
ملعونين ياهل الإدانة
الإدانة أصبحت رمز الخيانة
المقاومة هى مهر الأرض م اللى يحبها
والإدانة عمرها ماتكون بديل
الإدانة هى أحدث أسلحة يشيلها المذبذب والعميل
والسكات بيعلّى صوت السفاحين
ع الشاشات أطفال فى غزة مدبّحين
واحنا كل حين وحين نعيد سؤال (الست) ليفنى :
ليه حماس تطلق صاروخها ..
ع اللى ليل ونهار يبيعوا دمنا فى الخمّارات ؟
اللى أروع حلمهم معبد مكان الأهرامات
ياترى .. لو جينا نصرخ وقتها ينجدنا مين ؟
ماحنا موّتنا الحبايب والجنازة يومها مرّت من رفح
يازعييييييم الكيل طفح
والمذيع بيتفّ ع اللى بيسمعه ويشدّ فوقه البطانية
والضحايا بيحيوا لمّا يموتوا واحنا نموت فى أحضان الحياة
احنا فينا نسبة عالية من الجثث
والغريبة ان الجثث بتدفن الأحياء..
وتسمح للجنازة تمرّ من معبر رفح
رد مع اقتباس
المفضلات