أَنَا المَدْعُو بَنِي الإنْسانْ
وَرَبُّ الْعَرشْ كَرَّمْنِي
أنا الخُضْره
أنا المَيَّهْ
وزي الطِّينه تَكْوِينِي
أنا المَخْدُوعْ
ومش عارف
أنَا المَوْجُوعْ
وانا شايف
بان الدنيا مش دايمه
ومش هيَّ اللي تلْهِينِي
بِتِنْدَهْلِي
وِتِشْرَحْلِي
وبِتْحَاوِلْ تِتَوَّهْنِي
تِنَسِّينِي عَنَاوِيِنِي
تِسَابِقْنِي
تسهيني
تِلاحِقْنِي
وِرَبْ العَرْشْ بنَجِّينِي
يِثَبْتْنِي
يِوَفْقْنِي
لفعل الْخِيرْ بِيِهْدِينِي
ومشْ مغُرُورْ
وكلي سرور
بَاحِبِْ اعيش زي الْبَشَرْ
بِكُلْ الْمَعَانِي بَاعِزُّهُمْ
بَوِدُّهُمْ
واخلص لهم
وقَلْبِي جُوَّايَهْ إنْصَهَرْ
ِوهُوَّ دا حُكْمْ الْقَدَرْ
وياريتْ ياقلبي
يحسُّوا بيك ويقدَّروك
ولايجي يومْ ويْكدَّروك
ينافسوا فيك
ويحاربوا ليك
طبيعه جوَّاها اتْخَلَقت
م اللي خلق كل البشر
وبقدرته نطق الحجر
ولولا لطفه ورحمته
كنت اتخنقت
واللا زهقت
وهو دا كان الخطر
لكن صبرت
ومشيت طريقي ف دنيتي
ماسك لجامي ف قبضتي
ومهما سمعت
اصوم واصلي ركعتي
واتوب لربي ف خلوتي
مؤمن وراضي بالقدر
اصلي واسلم
علي خير البشر
المفضلات