واللهْ وفرَّحتينا يا غانا

إحنا معاكي وانتي معانا ...... خلـِّيتي الجماهير فرحانــــه
شرَّفتي القاره الغلبانـــه ......... واللهْ وفرَّحتينا يا غانــــــا
واللهْ وفرَّحتينا يا غانا
ـــــــــــــــــــــــــــــــ
هزِّيتـُم عرش البرازيل .......... بشطاره وبفن جميــــــــل
وجريتوا كتير زي الخيل ... والشوط في الجون زي الدانه
واللهْ وفرَّحتينا يا غانا
ـــــــــــــــــــــــــــــــــ
بنحِب صحيح البرازيل .......... علشان حرِّيفه على تقِيل
بس قلوبنا لغانا تميل ........... علشان هيَّ ف قاره معانا
واللهْ وفرَّحتينا يا غانا
ـــــــــــــــــــــــــــــــــ
أثبَتوُا إنـُكوُ لعِّيبــــــــه ... مش زي فريقنا ( بلا خيبه )
مليان بنماذج مضروبه ........ م الفقر ضعيفه وهفتانه
واللهْ وفرَّحتينا يا غانا
ــــــــــــــــــــــــــــــــ
مبروكه عليكـُم تِستاهلوا .......... ما الفالِح بيفرَّح أهلـُه
مش إحنا ولادنا اللي تساهلوا .. خلـُّوا الجمهور منهُم عانىَ
واللهْ وفرَّحتينا يا غانا
ـــــــــــــــــــــــــــــــ
لعِّيبة غانا احسن منهُم .......... لِعبُم مطرود واحد منهُم
غلـَبوا البرازيل غصْغبن عنهُم .. كانوا للكاس ناس شرقانه
والله وفرّحتينا يا غانا
ـــــــــــــــــــــــــــــ
إدونا دروس في الوطنيه ... وتعاونوا من غير أنانيه
وأصَّرُّوا على عَقـْد النيَّه ...... يبذلوا مجهودهُم بأمانه
واللهْ وفرَّحتينا يا غانا
ــــــــــــــــــــــــــــــ
مبروك واللهْ عليكوُ الكاس ... علشان كـُنتـُم أحسن ناس
أدِّيتوُا الواجب بحماس ....... مش زي ولادنا الخيبانه
واللهْ وفرَّحتينا يا غانا

*****************